23-noyabr kuni AARC xalqaro konsalting kompaniyasi tomonidan “Toshshahartransxizmat” AJ faoliyatini trasformatsiyalash bo‘yicha hisoboti e’lon qilindi, deb xabar bermoqda “Gazeta.uz”.
Unga ko‘ra, hozirgi kunda Toshkentda yo‘lkira narxi 1400 so‘mni (taxminan 0,13 dollar) tashkil etib, dunyoda shahar yo‘lovchilar transportidagi eng arzon tarif narxlaridan biri hisoblanishi aytildi. Shuningdek, Toshkentda o‘rnatilgan yo‘lkira haqi Nyu-York shahridan 20 barobar kamroq ekani ma’lum qilindi.
Qayd etilishicha, “Toshshahartransxizmat” kompaniyasi o‘z-o‘zini ta’minlamagani, daromad va xarajatlar o‘rtasidagi farq COVID-19 ta’sirisiz ham ancha ortganini kuzatish mumkin. Xorijiy konsultantlar buning asosiy sababi sifatida sayohat narxi faqat bir marta 2019-yilda 1200 so‘mdan 1400 so‘mga (4 foizga) o‘zgargani, xarajatlar esa 15 foizga oshgani tufayli deb baholamoqda.
Iqtisodchi Botir Qobilov o‘zining “Zametki Ekonomista” Telegram kanalida ushbu tahlilga o‘z munosabatini bildirgan.
“Narxning 4 foizi oshishi, tushumning 4 foiz oshganini bildirmaydi, lekin faraz qilaylik bu logika to‘g‘ri, ya’ni xarajatlar 15 foizga va tushum 4 foiz oshgan. Ammo gap shundaki, narx 1200 so‘mdan 1400 so‘mga oshishi narxning 4 foizga emas, balki 16.67 foizga oshganini bildiradi. Kalkulyatorda siz ham tekshirib ko‘ring, balki men adashayotgandirman? Demak, shunda yuqoridagi logikaning teskarisi to‘g‘ri bo‘lib chiqyaptimi (16,67 foiz > 15 foiz)? Balki matbuot xizmati ushbu matnda 4 foiz deb yozib xato qilgan bo‘lishlari mumkin yoki eng qo‘rqinchlisi, konsultantlarning o‘zi 1200 so‘mdan 1400 so‘mga o‘zgarishni 4 foiz deb hisoblab berishganmi?” — degan savolni o‘rtaga tashlagan Botir Qobilov.
Shuningdek, u Nyu-Yorkda bir martalik yo‘lkira narxi 2,25 dollar ekan, ya’ni o‘rtadagi farq 20 emas, 17,3 barobar ko‘proq ekanini ta’kidladi. Botir Qobilovning fikricha, yuqoridagi rasmlarda faqtgina nominal raqamlar ko‘rsatilgan.
“Oslo, Nyu-York va Toshkentni solishtirish uchun umumiy maxrajga keltirish kerak emasmi? Masalan, aholi daromadlaridagi farq inobatga olinishi kerak emasmi? Agar Toshkent va Nyu-Yorkdagi jamoat transporti foydalanuvchilari bir oylik o‘rtacha oyligining necha foizi jamoat transportida bir oy harakatlanish abonementiga sarflanadi, deb taqqoslansa, biroz mantiqiy solishtiruv bo‘lar edi”, — deb ta’kidlagan iqtisodchi.
Uning qayd etishicha, Nyu-Yorkda bir oylik jamoat transport abonementi 127 dollar turadi. Nyu-Yorkdagi bir kishining o‘rtacha oyligi esa taxminan 3333 dollarni tashkil qiladi. Nyu-Yorkda bir kishi o‘z daromadining 3,8 foizini yo‘lkiraga ishlatadi. Toshkentda bir oylik jamoat transporti abonementi 166 ming so‘m turadi, ya’ni bugungi kurs bo‘yicha 15,4 dollar. Toshkentda jamoat transportida yuradigan aholining o‘rtacha oyligini 200 dollar deb faraz qilgan holda bir kishi o‘z daromadining 7,7 foizini yo‘lkiraga ishlatadi. Yuqoridagi tahlildan Toshkentda yo‘lkira narxi Nyu-Yorkdagiga qaraganda 2 barobarga qimmatroq ekani kelib chiqadi.
“Shuning uchun, menimcha, nafaqat bu, balki shunga o‘xshash hisobotlarning to‘liq matni jamoatchilikka e’lon qilinishi kerak, shunda yuqoridagi savollarga javob topilishi mumkin, biz bekorga xavotir olayotgan bo‘lishimiz mumkin”, — deya qayd etgan Botir Qobilov.
Izoh (0)