Qirg‘izistonda Toshkent vaqti bilan soat 19:00 da (mahalliy vaqt bilan 20:00) parlament deputatligi saylovlari yakuniga yetdi. Bu haqda “Interfaks” xabar berdi.
Qirg‘iziston vaqti bilan soat 18:00 holatiga ko‘ra ovoz berish jarayonlarida 1 million 50 ming 163 nafar fuqaro yoki saylovchilar umumiy sonining 28,36 foizi ishtirok etgan. Yagona saylov okrugidagi ro‘yxatlarga jami 3 million 703 ming 420 nafar fuqaro kiritilgandi.
Saylovlarda ishtirok etish uchun 2 494 ta saylov uchastkasi shakllantirildi, shundan 59 tasi mamlakat hududidan tashqarida xorij davlatlari hududida tuzilgan. Eng oxirgi saylov uchastkasi dushanba kuni AQShning Chikago shahrida mahalliy vaqt bilan 08:00 da (Toshkent vaqti bilan 09:00 da) yopiladi.
Qirg‘iziston parlamenti tarkibi 90 nafar deputatdan iborat va ular besh yil muddatga saylanadi. Aralash saylov tizimiga ko‘ra 54 nafar deputat proporsional tizim bo‘yicha yagona saylov okrugidan saylanadi (siyosiy partiyalar ro‘yxatidagi nomzodlar), 36 nafar deputat esa bir mandatli saylov okruglarida ovoz berish yo‘li bilan saylanadi.
Saylovlarda ishtirok etadigan siyosiy partiyalar parlamentga kirish uchun 5 foizlik “dovon”dan o‘tishi talab etiladi. Bir mandatli okruglardagi nomzodlar eng ko‘p ovoz to‘plashi zarur.
Qirg‘izistonda saylov to‘g‘risidagi qonunga ko‘ra saylovlar amalga oshganini tasdiqlash uchun ro‘yxatga olingan saylovchilarning muayyan foizi qatnashgani ahamiyatga ega emas.
Qirg‘iziston markaziy saylov komissiyasi bergan ma’lumotlarga ko‘ra parlament saylovlarida 50 foizdan ortiq byulletenlar o‘rganib chiqilganidan keyin “Ota yurt Qirg‘iziston” partiyasi (ayni vaqtda mamlakatdagi hukmron partiya) yetakchilik qilmoqda.
Onlayn tarzda yangilanib turgan axborotlarga (Toshkent vaqti bilan 19:00 holatiga ko‘ra) muvofiq “Ota yurt Qirg‘iziston” partiyasiga 30 foiz saylovchilar ovoz bergan.
Ikkinchi o‘rinda 24,23 foiz ovoz bilan “Ishenim” (“Ishonch”) partiyasi, keyingi o‘rinlarda esa “Intimak” (“Rozilik”) 20,5 foiz va “Alyans” 14,6 foiz bormoqda.
Saylovlarda 5 foizlik “dovon”dan o‘tishi mumkin bo‘lgan partiyalar qatoriga esa “Butun Qirg‘iziston” 11 foiz, “Imon nuri” 10 foiz, “El umidi” 8,8 foiz, “Ozodlik” 7,69 foiz, Sotsial-demokratlar 6,18 foiz hamda “Ota Makon” 6,4 foiz kirgan.
Bir yil avval oktabr oyida Qirg‘izistonda parlament saylovlari bo‘lib o‘tgan, keyinchalik Qirg‘iziston Markaziy saylov komissiyasi Bishkekda ommaviy norozilik namoyishlari boshlanishiga sabab bo‘lgan parlament saylovlari natijalarini haqiqiy emas deb topgandi. 2021-yil avgustda Qirg‘iziston prezidenti Sadir Japarov 28-noyabr kuni Respublika parlamenti deputatlari saylovini o‘tkazish to‘g‘risida farmonni imzolagan.
Izoh (0)