Navoiydagi ohak ishlab chiqarish sexida gazdan noqonuniy foydalanish holati aniqlandi, deb xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Departamentning Navoiy viloyati boshqarmasi tomonidan o‘tkazilgan tergovga qadar tekshiruvda “S.S.” MChJning gaz ta’minotidan qarzdorligi mavjudligi sababli tarmoqdan uzib quyilgan bo‘lsada, MChJ mas’ul shaxslari maxsus tamg‘aga shikast yetkazish orqali gaz hisoblagich uskunasiga qasddan tashqi ta’sir ko‘rsatib tabiiy gazdan foydalangani aniqlangan.
Oqibatda davlat va jamiyat manfaatlariga 295 million so‘m zarar yetkazilgan.
Mazkur holat yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Urganchdagi ohak ishlab chiqarish sexi 1,4 milliard so‘mlik tabiiy gazdan noqonuniy foydalangani, Namangandagi korxona 10 ming xonadonning 1 kunlik iste’moliga teng gazdan noqonuniy foydalangani aniqlangandi. Shuningdek, Jizzaxda gaz tarmog‘idan noqonuniy foydalangan avtomobillarga gaz quyish shoxobchasining faoliyati fosh etilgandi.
Izoh (0)