Dubayda bo‘lib o‘tgan Expo-2020 butunjahon ko‘rgazmasida Tiffany&Co zargarlik uyi kompaniya tarixidagi eng qimmat zargarlik buyumini taqdim etdi, deb yozadi “Korrespondent.net”.
Qayd etilishicha, World’s Fair taqinchog‘ida umumiy og‘irligi 180 karat bo‘lgan 578 ta olmos Imperiya deb nomlangan 80 karatlik toshni bezatib turibdi. Uni taqinchoqdan ajratib olib, uzukka ham o‘rnatish mumkin.
Bu 1939-yilgi Jahon ko‘rgazmasi uchun yaratilgan 200 karatdan ortiq akvamarinli Tiffany marjonining yangilangan versiyasidir. Aksessuarning narxi 20 milliondan 30 million dollargacha baholanmoqda. Brend vakillari sotuvga qo‘yilgan marjonning haqiqiy narxini hozircha ma’lum qilmagan.
Zargarlik buyumi 2021-yil yanvar oyida, Botsvanada qazib olingan oval shakldagi olmos sotib olinganidan keyin yaratila boshlandi. U Tiffany&Co tomonidan sotuvga chiqarish uchun xarid qilingan eng katta tosh bo‘ldi. Ma’lum bo‘lishicha, olmos Isroilda sayqallangan, shundan so‘ng brendning Nyu-Yorkdagi ustaxonasiga yuborilgan.
Izoh (0)