Тошкент шаҳрида қизнинг кийимсиз ҳолда тушган видеосини тарқатиш билан қўрқитиб, 5 минг АҚШ доллари талаб қилган шахсга суд ҳукми ўқилди. Бу ҳақда «ЎзА» хабар берди.
Маълум қилинишича, Ж.А. (исм ва фамилиялар ўзгартирилган) исмли йигит товламачилик орқали пул топиш мақсадида Ш.Ж. исмли қиз билан ижтимоий тармоқлар орқали анча вақт гаплашиб, кейинчалик Имо мессенжери ёрдамида у билан гаплашган. Шундай суҳбатларнинг бирида у қизни кийимсиз ҳолда видеотасвирга тушиб, ўзига юборишга кўндирган.
Йигит видеотасвирни қўлга киритганидан сўнг қиздан пул ундирмоқчи бўлган. Telegram мессенжерида профил очиб, қиз билан боғланган. Кейин унга видеотасвирларнинг скриншотини юбориб, агар 5 минг доллар бермаса, уни яқинларига юбориш билан таҳдид қилган. Қиз эса тарқатмаслик эвазига 2500 доллар бера олишини айтган. Шундан кейин йигит пулни яқин атрофда жойлашган савдо мажмуасида олишини маълум қилган.
Пулни олишга ўзи борса, қиз уни таниб қолишидан қўрқиб, Ж.А. қариндоши У.А.га «Бир танишимнинг менда қарзи бор, имконинг бўлса, ўша пулни олиб кел. У пулни савдо мажмуасига олиб келади. 2500 долларни олганингдан кейин манави тилхат билан хотира картасини унга берасан», — деб алдаган. У.А. учрашув белгиланган савдо мажмуасининг олдида Ш.Ж. билан учрашиб, пулни олаётганида тезкор ходимлар томонидан қўлга олинган.
Қайд этилишича, суд мажлисида Ж.А. ўз айбига қисман иқрорлигини, дастлабки терговда берган кўрсатмасини тасдиқламаслигини билдирган. Шунингдек, Ш.Ж. билан ўқувчилик пайтидан бери гаплашиб юришини, кейинчалик Хитойга ўқишга кетгани сабаб қиз билан кўриша олмаганини, фақат ижтимоий тармоқ орқали мулоқот қилганини айтган.
Йигит қиз билан турмуш қурмоқчи бўлган, аммо қизнинг ота-онаси уни бошқа йигитга унаштирган. Йигитга эса бу нарса қаттиқ алам қилган ва гўёки қиз учун сарфлаган пулларини шу йўл билан ундириб олмоқчи бўлган. Гарчи судланувчи айбига қисман иқрор бўлса-да, унинг айби етарли далиллар билан исботланган.
Мазкур ҳолат юзасидан Ж.А.га Жиноят кодексининг 165-моддаси 1-қисми билан (товламачилик) 4 йил муддатга сутканинг кечки соат 22:00 дан эртаси куни соат 06:00 га қадар озодликни чеклаш жазоси тайинланган.
Изоҳ (0)