Bugun,

  • USD 10920.28
  • RUB 177.49
  • EUR 11052.42

Toshkentda bir qizning ishonchiga kirib, u bilan ishqiy munosabatda bo‘lib va bu orqali undan pul undirib kelgan shaxs qo‘lga olindi, deb xabar beradi poytaxt IIBB axborot xizmati.

Ma’lum qilinishicha, 21 yoshda bo‘lgan M. ismli qiz ijtimoiy tarmoq orqali 26 yoshli B. bilan tanishib qolgan. Ular Telegram’da tez-tez yozishib turgan va ular o‘rtasida yaqinlik paydo bo‘lgan. O‘zaro suhbatlar davomida yigit M.ga qo‘ng‘iroq qilib, biznes bilan shug‘ullanmoqchi ekanini aytgan va Qozog‘istondan kafel xarid qilish uchun pul so‘ragan. Mablag‘ katta bo‘lmagani sabab M. darrov plastik kartasi orqali zarur pulni ko‘chirib bergan. Oradan bir necha kun o‘tgach, B. yana qo‘ng‘iroq qilib, kafellar sotilmaganini va ularni qaytarish uchun yana 1 million so‘m kerakligini aytgan.

Shuningdek, yigit M.dan o‘z nomiga 3 million so‘mlik telefonni kreditga olishini iltimos qilgan. Yigitga telefon biznesni rivojlantirish uchun kerak bo‘lganini aytgan, ammo keyinchalik kreditni qiz to‘lashiga to‘g‘ri kelgan.

Kunlardan birida B. M.ni ijarada turadigan uyiga taklif qilgan va ular orasida yaqinlik sodir bo‘lgan. Shu kuni kechqurun yigit M.ga qo‘ng‘iroq qilib, ularning yaqinligi xonadon egasi tomonidan o‘rnatilgan yashirin kamera orqali tasvirga tushirilganini, uy egasi 15 million so‘m so‘rab, aks holda videoni internetga joylashi bilan qo‘rqitayotganini aytgan.

Sharmandalikdan qo‘rqqan qiz B.ga 500 AQSh dollarini berib yuborgan. Bir necha kundan so‘ng B. yana qo‘ng‘iroq qilib, xonadon egasi videoni prokuraturaga topshirganini aytgan. Shuningdek B. so‘roqqa borib kelganini, tergovchi agar 20 ming dollar bermasa, M. va uning ota-onasini chaqirib, videomaterialni ularga ko‘rsatishi bilan qo‘rqitganini qo‘shimcha qilgan. B. uyini 18 ming dollarga sotib masalani hal qilishini aytgan, ammo 2 ming AQSh dollarini M.ning o‘zi topishi kerak bo‘lgan.

Qizning otasi uydan pullar yo‘qolayotganini payqab qolgan va qizi bilan o‘zaro gaplashgan. Shu sabab qiz otasiga hamma narsani aytib berishga majbur bo‘lgan. M.ning otasi qizini kechirgan va ular birgalikda huquqni muhofaza qilish organlariga ariza yozgan.

Keyingi kuni M. va B. kafeda uchrashgan va qiz yigitga pullarni uzatganida u huquqni muhofaza qilish organlari xodimlari tomonidan qo‘lga olingan.

So‘roq davomida B. qilmishiga iqror bo‘lib, qizni aldab olgan barcha pullarni o‘z ehtiyojiga sarflab yuborganini aytgan. B.ga Jinoyat kodeksining 168-moddasi (firibgarlik) 2-qismi va 165-moddasi (tovlamachilik) 2-qismi bo‘yicha jinoyat ishi qo‘zg‘atilgan.

Avvalroq Buxoroda ishqiy munosabatda bo‘lib kelgan tanishini qo‘rqitib, undan pul undirgan qizga jinoyat ishi qo‘zg‘atilgani to‘g‘risida xabar berilgandi.

Izoh
Asosiy yangiliklar
Dunyo
Braziliya prezidenti Jair Bolsonaru bloger bilan mushtlashdi (video)
Mahalliy
Namanganda Qur’oni Karimning noyob qo‘lyozmasini o‘g‘irlab ketgan shaxslar qo‘lga olindi (video)
Mahalliy
Sirdaryoda Isuzu avtobusi gaz balloni portlagani yuzasidan jinoyat ishi qo‘zg‘atildi