Senat raisi Tanzila Norboyeva 18-noyabr kuni o‘tkazilgan 21-yalpi majlis davomida ayollarni reabilitatsiya qilish markazlari, xotinlariga zo‘ravonlik qilayotgan erlar haqida to‘xtalib o‘tdi.
“NNT tomonidan ayollarni reabilitatsiya qilish markazlari xalqaro standartlar asosida ish olib boryapti, biz xotin-qizlarga ijtimoiy yordam berishda ularning tajribasidan ham foydalanishimiz kerak. Shuningdek, mazkur yo‘nalishda kadrlar salohiyati masalasi ham muhim. Kimlar ayollarni reabilitatsiya qilyapti? Kimlar ayollarga psixologik, ijtimoiy-huquqiy yordam beryapti? Bu borada ham muammolar yetarli”, — degan Tanzila Norboyeva.
Senat raisi bugungi kunda yordamga muhtoj ayollarga huquqni muhofaza qiluvchi organlar tomonidan himoya orderlari berilayotgani, lekin o‘sha ayol bir oydan so‘ng zo‘ravon eri bilan yana hayotini davom ettirayotgani, yana qaytadan avvalgi salbiy holatlar yuz berayotganini ham qayd etib o‘tgan.
“Shuning uchun biz birinchi navbatda bu toifadagi ayollarni to‘liq normal hayotga qaytarish choralarini ko‘rishimiz kerak. Ularni ‘ayollar daftari’ga kiritib, uy-joy masalasi, kasbga o‘qitish va bandligini ta’minlash choralarini ko‘rish lozim. Bu ham inson huquqi, ayol huquqi”, — deydi u.
Tanzila Norboyeva, shuningdek, xotinlariga zo‘ravonlik qilayotgan shaxslarga nisbatan ko‘rilayotgan choralar yetarli emasligini ta’kidlagan.
“Xotinlariga zo‘ravonlik qilayotgan shaxslarga nisbatan ko‘rilayotgan choralar yetarli emas. Garchand ular qonunchiligimizda belgilangan bo‘lishiga qaramay. Shunday bo‘lsa ham bu bo‘yicha ishlarni tizimli nazoratga olish kerak”, — degan Senat raisi.
Eslatib o‘tamiz, 2021-yilning mayida O‘zbekistonda ayollarni reabilitatsiya qilish respublika markazlari tashkil etildi. Markazlarning asosiy vazifalaridan biri tazyiq va zo‘ravonlikdan jabr ko‘rgan, o‘z joniga suiqasd qilgan yoki o‘z joniga qasd qilishga moyilligi bo‘lgan xotin-qizlarga anonim tarzda shoshilinch tibbiy, psixologik, ijtimoiy, pedagogik, huquqiy va boshqa yordam ko‘rsatish hisoblanadi.
Tanzila Norboyeva 2020-yilning 21-dekabrida Gender tenglikni ta’minlash masalalari bo‘yicha o‘tkazilgan komissiya majlisida ayollarimiz manfaati, tinch-xotirjamligi va oilalarimiz mustahkam bo‘lishi uchun kurashamiz, deb aytgandi.
Izoh (0)