“Jiguli” piyodaning umriga zomin bo‘ldi, “Zil” va “KamAZ” to‘qnashdi. So‘nggi kunlarda sodir bo‘lgan YTHlar tafsiloti

So‘nggi kunlarda O‘zbekiston yo‘llarida sodir bo‘lgan hodisalar haqida ma’lumot taqdim etamiz.

Samarqandda “Jiguli” piyodaning umriga zomin bo‘ldi

Samarqand shahrida “Jiguli” piyodani urib ketdi, deya xabar bermoqda IIV axborot xizmati.

Qayd etilishicha, 2021-yil 12-noyabr kuni ertalab “Jiguli” avtomashinasi katta tezlikda harakatlanib kelib, boshqaruvni yo‘qotgan va yo‘l chetidagi piyodani urib ketgan. Shundan keyin transport vositasi beton ustunga borib urilgan.

Oqibatda piyoda tan jarohati olib, shifoxonada vafot etgan. Haydovchi ham tan jarohatlari bilan shifoxonaga yotqizilgan.

Payariqda “Zil” va “KamAZ” to‘qnashdi

2021-yilning 14-noyabr kuni soat 16:00 larda Samarqand viloyati, Payariq tumani, “Polvon ariq” MFY hududida o‘tkazilgan uloq-ko‘pkari o‘yini davomida bellashuv bo‘lib o‘tayotgan joy atrofidagi balandlikda turgan “KamAZ” rusumli yuk avtomobili haydovchisi e’tiborsizlik qilib, qo‘l tormozini tortmaganligi natijasida avtomobil pastlikka harakatlanib ketgan va “Zil” rusumli yana bir yuk avtomobili bilan to‘qnashgan.

Hodisa natijasida tan jarohati olgan fuqarolar yo‘q.

Mazkur holat yuzasidan Payariq tumani IIB YHXB xodimlari tomonidan surishtiruv ishlari olib borilmoqda.

Samarqandda drift qilgan haydovchi jazolandi

Ijtimoiy tarmoqda Nexia rusumli avtomobil haydovchisi o‘zi va o‘zgalarning hayotini xavf ostiga qo‘yib, drift qilgani tasvirlangan video tarqaldi va keng jamoatchilik e’tirozlariga sabab bo‘ldi.

Mazkur video Samarqand viloyati IIB YHXB xodimlari tomonidan o‘rganilib, ushbu haydovchi aniqlandi va unga nisbatan tegishli tartibda ma’muriy bayonnoma rasmiylashtirildi.