Арманистон президенти Армен Саркисян бош вазир Никол Пашиняннинг таклифига биноан мудофаа вазири Аршак Карапетянни лавозимидан озод қилди. Унинг ўрнига бош вазир ўринбосари Сурен Папикян тайинланди. Бу ҳақда Арманистон президенти маъмурияти матбуот хизматига таяниб, «ТАСС» хабар берди.
«Президент Армен Саркисян бош вазирнинг таклифини асос қилиб олган ҳолда, мудофаа вазири Аршак Карапетянни лавозимидан озод этиш тўғрисидаги фармонни имзолади. Президентнинг бошқа фармонлари билан Сурен Папикян бош вазир ўринбосари лавозимидан озод қилиниб, мудофаа вазири этиб тайинланди», — дейилади хабарда.
Карапетян шу йилнинг август ойи бошида Арманистон мудофаа вазири этиб тайинланган эди. Папикян эса Пашиняннинг энг яқин сафдошларидан бири ва «Фуқаролик шартномаси» ҳукумат партиясининг раисидир.
Перуда 2 ноябрь куни ички ишлар вазири Луис Баррансуэла, ўша ҳафтада, 8 ноябрь куни эса мудофаа вазири Уолтер Эдисон Аяла Гонсалес истеъфога чиқишини эълон қилганди.
11 ноябрь куни Чехия ҳукуматининг раҳбари Андрей Бабиш ва мамлакат ҳукумати истеъфога чиқди. Ундан аввал Швеция бош вазири Стефан Лёвен истеъфога чиқиш тўғрисида ариза бергани, унинг ўрнини аёл киши эгаллаши мумкинлиги ҳақида хабар қилинганди.
Аввалроқ Канадада қишлоқ хўжалиги вазири ичкиликбозлик сабаб истеъфога чиққан, Украинада эса бош вазирнинг икки ўринбосари ўз лавозимини тарк этган.
Изоҳ (0)