Omadsiz rinoplastikadan aziyat chekkan yulduzlar (foto)

Plastik jarrohlik qildirishga ahd qilib, keyinchalik pushaymon bo‘lgan mashhurlar haqida ma’lumot beramiz.

Kortli Lav

Marhum Kurt Kobeynning rafiqasi yanada chiroyliroq ko‘rinishga ega bo‘lish uchun bir necha marta tig‘ ostiga yotishga rozi bo‘lgan. U lablarini shishirishdan tashqari, burun shaklini ham o‘zgartirgan. Karyerasi uchun rinoplastika qildirgani va shundan keyin imkoniyatlar eshigi ochilganini ta’kidlagan Kortni olti oy ichida hayoti butkul o‘zgarganini qo‘shimcha qilgan. Biroq u operatsiyani omadsiz o‘tgani, burnidagi qiyshiqlik butkul bartaraf bo‘lmaganiga to‘xtalmagan.

Maykl Jekson

Pop qiroli Mayklni rinoplastika qurbonlaridan biri deb atasa bo‘ladi. U burun shaklini o‘zgartirish uchun bir emas, bir necha marta operatsiya qildirgan, ammo natija har safar avvalgisidan yomonroq bo‘lgan. Gollivudda hatto Maykl nafas ololmay qolgan degan mish-mishlar paydo bo‘lgan.

Jennifer Grey

Kinosanoatdagi ilk urinishi omadli chiqqanidan keyin Jennifer birdaniga mashhur bo‘lib ketgan. Uning Gollivuddagi karyerasi omadli bo‘lishi mumkin edi, ammo hammasi boshqacha bo‘lgan. Grey rinoplastika qildirganidan keyin burni hammanikidek ko‘rinib qolgan. Shundan keyin rejissorlardan kelib tushadigan takliflar ham kamaygan.

Tori Spelling

“Beverli Xillz 90210” serialidagi roli sabab mashhurlikka erishgan Tori Spelling ilk marta 17 yoshida rinoplastika qildirgan. Otasining boyligini jarrohlik operatsiyalariga ayamay sarflagan qizning ko‘rinishi rinoplastikadan keyin yaxshi tomonga o‘zgarmagan. Nosimmetrik bo‘lib qolgan burnini quyuq pardoz bilan yashirishiga to‘g‘ri kelgan.

Karmen Kampusano

Meksikalik model Karmen o‘z vaqtida yetarlicha mashhur bo‘lgan. Hammasi taqiqlangan moddalarga mukkasidan ketganidan so‘ng o‘zgargan. O‘sha vaqtda rinoplastika qildirishga qaror qilgani esa yaxshi natijaga olib kelmagan. Burni avvalgidan qiyshiqroq ko‘rina boshlagani yetmagandek nafas olishi ham qiyin bo‘lgan.