Mudhish yo‘l-transport hodisalariga uchrab, omon qolgan o‘zbek shou-biznesi vakillari (foto)

Inson yoshi va kasb-koridan qat’i nazar, umrining so‘nggiga qadar yo‘l harakati ishtirokchisi hisoblanadi. Yo‘llarda ba’zan haydovchi, ba’zida esa oddiy yo‘lovchi sifatida harakatlanamiz. Ikki vazifada ham hushyorlik va ehtiyotkorlikni qo‘ldan boy bermaslik shart. Bo‘lmasa, oqibati ayanchli bo‘lishi aniq.

Quyida dahshatli yo‘l-transport hodisasiga uchrab, jismoniy va ruhiy salomatligini tiklay olgan ijodkorlar haqida ma’lumotlar keltiriladi.

Xosiyat Husanovaning yuzini tanib bo‘lmasdi

Aktrisa Xosiyat Husanova 2008-yili jiddiy avtohalokatga uchragan. O‘shanda uning yuzi tanib bo‘lmas darajaga kelgani, hatto shoshilinch yordam bilan kasalxonaga olib borishganida avvaliga uni tanishmagani haqida intervyularida aytgan. Shifokorlar aktrisaga kuchli miya chalqalishi va umurtqa pog‘onasining jiddiy shikastlanishi tashxisini qo‘yishgan. Aktrisa avariyadan so‘ng xotirasi va eshitish qobiliyati ancha yomonlashganini aytadi.

Jahongir Poziljonov komaga tushgandi

2009-yil “Bojalar” guruhi uchun og‘ir kelgan. Boisi o‘sha yilning 28-iyun sanasida “Bojalar” guruhi vakillari Termizdagi konsert dasturidan qaytayotgan paytda rulga uxlab qolinishi sababli ayanchli yo‘l-transport hodisasiga uchragan. Xonanda Mo‘min Oripov voqea joyida vafot etgan. Guruh a’zosi Jahongir Poziljonov og‘ir ahvolda kasalxonada yotqizilgan va bir necha kun komada bo‘lgan. U o‘ziga kelganidan so‘ng ham sog‘lig‘ini tiklashi qiyin kechgan. Oyog‘i singan xonanda ancha paytgacha oqsoqlanib yurgan.

Haydovchi rulda uxlab qolgandi

Ayni kunlarda AQShda istiqomat qilayotgan xonanda Sobirjon Mo‘minov ham yo‘l-transport hodisasiga uchragan. 2010-yilning ayni to‘y mavsumida viloyatdan qaytayotganda haydovchining rulda uxlab qolishi sabab mashina to‘siqqa urilgan. Xonanda gips qo‘li va shilingan yuzi bilan xalqqa ko‘rinishni istamay, bir muddat omma e’tiboridan chetda yurishga majbur bo‘lgandi.

“Syomka”dan qaytayotib, avariyaga uchragan

Aktrisa va dizayner Shahzoda Muhammedova ko‘p yillardan buyon avtomobil boshqaradi. U ko‘p marta shoshqaloqligi sabab tezlikni oshirgani uchun ogohlantirish olgani va jarima to‘laganligini aytgan. 8 yil avval esa jiddiy yo‘l-transport hodisasiga uchragan. O‘shanda u tungi soat 03:00 da suratga olish maydonchasidan qaytayotgan bo‘lgan. O‘sha paytdagi Nexia avtomobili tanib bo‘lmas darajaga kelganligi haqida OAVda ma’lum qilingandi. Yaxshiki, aktrisaga u qadar jiddiy jarohat yetmagan.

Ancha vaqt yurishga qiynaldi

Xushovoz xonanda Ahror Usmonov 2016-yilning 22-iyun kuni yaqinlari bilan tog‘ga dam olish uchun chiqib ketayotganda mudhish avariyaga uchragan. Mashina xonanda Alijon Isoqovga tegishli bo‘lgan, ammo rulda Ahror Usmonovning ayoli bo‘lgan. Tajribasiz haydovchi sabab mashina yo‘l chetidagi betonga urilgan. Mashinadagilarning bari jiddiy jarohatlar bilan kasalxonaga yotqizilgan. Shifokorlar xonandaga tos suyagining sinishi tashhisini qo‘yishgan. Shu bois xonanda uch oy jiddiy tartib davolanib, o‘rnidan qo‘zg‘almagan. Bir yilgacha esa yurishga qiynalgan.

Uni mashinadan sog‘-salomat chiqishiga ishonishmagandi

Aktrisa va stilist So‘g‘diyona Azimova 2019-yil 18-noyabr kuni mudhish avariyaga uchragan. Bu holatga uning ortidan katta tezlikda kelayotgan Lacetti rusumidagi mashinaning urilishi sabab bo‘lgan. Aktrisaning bir yil avval xarid qilgan Lada rusumli mashinasi tanib bo‘lmas darajaga kelgan. Garchi aktrisa jiddiy jarohat olmagan bo‘lsa-da, uzoq vaqt kuchli ruhiy zo‘riqish ta’sirida bo‘lganini ko‘p bor ta’kidlagan. Aktrisa mashina ichida sog‘-omon chiqishiga hech kim ishonmaganligini aytadi.

Yangi yil kechasidagi avariyadan esdalik qoldi!

Yosh aktyor Abdulloh Mas’udov 2019-yilning 31-dekabr kuni tungi soat 00:02 da mudhish avariyaga uchragan. Katta tezlikda kelayotgan avtomobil stevaforning qizil chirog‘iga bo‘ysunmay, chorraha bo‘ylab harakatlanishni boshlagan Matiz rusmli avtomobilga kelib urilgan. Uni marhum ijodkor Fathulla Mas’udovning kenja o‘g‘li Abdulloh boshqarayotgan edi. Aktyorning yuzidagi chandiq ham avtohalokatdan yodgorlik bo‘lib qolgan. Jiddiy jarohat sabab u bir necha kun jonlantirish bo‘limida davolangan.

Navbatda turib olingan Spark’da avariya uchragan

Qiziqchi Avaz Oxun avtohalokat sodir bo‘lgan kunni eslashni ham istamaydi. Chunki u yangi, navbatda turib olgan mashinasidan ham ko‘ra orqa o‘rindiqda o‘tirgan qizining ahvolidan tashvishlangan. U mashinasini vodiydagi yaqinlariga ko‘rsatib, suyunchi olish maqsadida oilaviy safarga otlangan. Uch kun avval avtosalondan chiqqan mashinada Toshkentga qaytayotganida Qo‘qon—Toshkent trassasida mudhish voqea sodir bo‘lgan. Bunga Avaz Oxunning rulda uxlab qolishi sabab bo‘lgan. Hayriyatki, hech kim jiddiy jarohat olmagan.

Qoshidagi chiziq avariyadan esdalik...

Xonanda Jo‘rabekning ijodiy tanaffusiga oz miqdorda bo‘lsa-da, avtohalokat ham sabab bo‘lgan. U qadar jiddiy jarohat olmagan bo‘lsa-da, avariyadan so‘ng qo‘rquv hissi hech bir insonni osonlikcha tark etmaydi. Xonandaning qoshlaridagi chiziqlar ham jarohatdan esdalik bo‘lib qolgan.