Rossiya tarkibiga kiruvchi Tatariston Davlat kengashining davlat qurilishi va mahalliy o‘zini o‘zi boshqarish bo‘yicha qo‘mitasi Rossiya Federatsiyasi hududidagi davlat hokimiyati organlarining yagona tizimi to‘g‘risidagi qonun loyihasiga 20 ta tuzatish tayyorladi. Ular qonun chiqarish jarayonini tashkil etish, hududiy hokimiyat organlari faoliyati hamda mamlakat subyektlarining qonun chiqaruvchi va ijro etuvchi hokimiyatlarining o‘zaro hamkorligi kabilarni nazarda tutadi. Bundan tashqari, tuzatishlarda respublika prezidenti lavozimini saqlab qolish taklifi ham bor, deb yozadi “Kommersant”.
“Biz Rossiya Federatsiyasi subyektidagi eng yuqori mansabdor shaxs egallab turgan lavozimning nomi Konstitutsiyada, Rossiya Federatsiyasi subyektining nizomida, ushbu hudud xalqining xohish-irodasini hisobga olgan holda belgilanishini taklif qilamiz. Menimcha, bu yerda qog‘ozga o‘rashning hojati yo‘q. Bizning taklifimiz va o‘zgartirishimiz aynan shunday yangraydi”, — dedi Tatariston Davlat kengashining davlat qurilishi bo‘yicha qo‘mitasi raisi Albert Xabibullin.
Uning ta’kidlashicha, qonun loyihasining ayrim qoidalari demokratik federal huquqiy davlat bo‘lgan Rossiyaning konstitutsiyaviy tuzumi asoslariga zid keladi.
“Biz federal darajadagi qo‘shma boshqaruv bilan bog‘liq masalalarni batafsil tartibga solishning hojati yo‘q deb hisoblaymiz. Darhaqiqat, qonun loyihasining mazkur tahririda subyektlar o‘z qonunchiligini, jumladan, mahalliy va tarixiy xususiyatlarni hisobga olgan holda tartibga solish imkoniyatiga ega emas”, — dedi Xabibullin.
Qonun loyihasiga o‘zgartirishlar Tatariston Davlat kengashi tomonidan ko‘rib chiqiladi, keyin Rossiya Davlat Dumasiga taqdim etiladi.
9-noyabr kuni Davlat Dumasi birinchi o‘qishda Rossiya Federatsiyasi subyektlarining vakolatlarini belgilovchi, gubernatorlarning ketma-ket ikki muddatdan ortiq saylanishiga qo‘yilgan taqiqni bekor qiluvchi va ular uchun yagona besh yillik vakolat muddatini joriy etuvchi qonun loyihasini qabul qildi.
Hujjatda mamlakat prezidentiga ishonch yo‘qolgan holda hudud rahbarlarining iste’foga chiqishi uchun asoslar kengaytirilgan. Bundan tashqari, subyektlar rahbarlarini “prezident” deb atash taqiqlanadi. Federatsiya tarkibida hozir prezident nomini saqlab qolgan yagona subyekt Tataristondir.
Oktabr oyi oxirida Tatariston Davlat kengashi Rossiya tarkibiga kiruvchi hududlardagi eng yuqori mansabdor shaxslar uchun umumiy nom — Rossiya Federatsiyasi subyektining rahbari nomini belgilash to‘g‘risidagi qonunga qarshi chiqdi. Mahalliy hokimiyat prezident lavozimining nomini o‘zgartirishga urinishni konstitutsiyaga zid deb atadi. Tataristonning pozitsiyasiga qaramay, qonun loyihasi tuzatilgani yo‘q.
Izoh (0)