Eron tashqi ishlar vazirining o‘rinbosari Ali Bageriy Eron va Buyuk Britaniya 1979-yilda Tehronga tanklar yetkazib berilmagani bo‘yicha 400 million funt sterling (535 million dollar) miqdorida qarzini to‘lash bo‘yicha kelishuvga erishdi, deb xabar beradi “RIA Novosti”.
“Qarzni qaytarish borasidagi asosiy masala va uning miqdori kelishilgan, ammo to‘lov usuli va jarayoni hozircha hal etilmagan”, — deydi eronlik diplomat.
BMTning Xalqaro sudi 2012-yilda Buyuk Britaniyani 1974-yilda International Military Services (IMS) kompaniyasi va Eron o‘rtasida imzolangan shartnomaning buzilishi bo‘yicha kompensatsiyani to‘lashga chaqirgan edi. Ushbu bitim bo‘yicha kompaniya Eronga mingdan ortiq Britaniya tanklarini yetkazib berishi kerak bo‘lgan, ammo 1979-yili Eronda yuz bergan inqilob sabab London shartnoma shartlarini bajarishdan bosh tortgan. Tehron hozirga qadar buning uchun kompensatsiya undirib kela olmayotgandi. Angliya hukumati Eron Mudofaa vazirligi sanksiyalar ostida bo‘lgani sabab qarzini qaytara olmasligini ta’kidlab kelmoqda.
Avvalroq Eron Buyuk Britaniya, Fransiya va Germaniya bilan yadroviy bitimga qaytish yuzasidan muzokaralar o‘tkazishga tayyorligini bildirgani, Jo Bayden Eronga qarshi 1979-yilda joriy etilgan sanksiyalarni uzaytirgani to‘g‘risida xabar berilgandi.
Izoh (0)