Istanbulda Turkiy kengashga a’zo davlatlar rahbarlari bayroq ko‘tarish marosimida ishtirok etdi
Istanbulda 12-noyabr kuni Turkiy kengash kotibiyatining yangi binosi oldida bayroq ko‘tarish marosimi bo‘lib o‘tdi, deb xabar bermoqda Prezident matbuot xizmati.
Unda O‘zbekiston Prezidenti Shavkat Mirziyoyev va qardosh mamlakatlar rahbarlari ishtirok etgan. Tantanali ravishda O‘zbekiston, Ozarbayjon, Turkiya, Qirg‘iziston, Qozog‘iston hamda Vengriya, Turkmaniston va tashkilotning bayroqlari ko‘tarilgan.
Xabarda aytilishicha, Turkiya prezidenti Rajab Toyyib Erdo‘g‘on tadbir ishtirokchilariga murojaat qilib, mamlakatlar o‘rtasidagi ko‘p qirrali sheriklikni yanada rivojlantirish muhim ekanligini ta’kidladi hamda ushbu kotibiyat tashkilot maqsad va vazifalarini amalga oshirishda bundan buyon ham muhim o‘rin tutishiga umid bildirdi.
Turkiy kengash kotibiyati joylashgan bino XIX asr boshida barpo etilgan hamda Istanbul shahrining Fotih tumanida joylashgan.
Eslatib o‘tamiz, Shavkat Mirziyoyev 11-noyabr kuni Turkiy tilli davlatlar hamkorlik kengashi sammitida ishtirok etish uchun Istanbul shahriga keldi va shu kuni o‘ziga ajratilgan qarorgohda Turkiy tilli davlatlar hamkorlik kengashi bosh kotibi Bag‘dod Amreyevni qabul qildi.
Sammitning asosiy tadbirlari 12-noyabrga mo‘ljallangan. Davlat rahbari qator ikki tomonlama uchrashuvlar o‘tkazishi rejalashtirilgan.
