Сирдарёда фарзандларининг алимент пулини тўламаган аёлга нисбатан чора кўрилди

Мажбурий ижро бюроси Сирдарё вилояти Гулистон шаҳар бўлими иш юритувига ноодатий алимент ундируви билан боғлиқ ижро ҳужжати келиб тушиб, ижро ҳаракатлари олиб борилди. Бу ҳақда бюро матбуот хизмати «Дарё»га маълум қилди.

Маълум қилинишича, А.Ашурова (исми шарифи шартли ўзгартирилган) оиласидан воз кечиб, икки нафар норасида гўдакларини турмуш ўртоғига ташлаб кетган.

А.Ашурованинг турмуш ўртоғи болаларни ўз тарбиясига олиб, уни моддий таъминот билан таъминлашда қийналгани сабабли фуқаролик ишлари бўйича Гулистон туманлараро судига болаларнинг онасидан алимент ундириб беришини сўраб қилган мурожаати қаноатлантирилган.

Мазкур суднинг 2018 йил 20 сентябрдаги алимент ундириш тўғрисидаги ижро ҳужжати бўйича Бюронинг Гулистон шаҳар бўлими давлат ижрочилари томонидан ижро ҳаракатлари олиб борилиб, вояга етмаган фарзандлари Муроджон ҳамда Маржонанинг моддий таъминлашдан бўйин товлаган она билан бир неча бор тушунтириш-тарғибот ишлари олиб борилган ва расман огоҳлантирган бўлса-да, 27 ойдан ортиқ муддат мобайнида 13 029 571 сўмлик алимент пулларини тўлашдан қасддан бош тортиб келган.

Шу сабабли 2020 йил 19 ноябрда Гулистон шаҳар маъмурий суди томонидан Маъмурий жавобгарлик тўғрисидаги кодекснинг 47–4-моддасида (вояга етмаган ёки меҳнатга лаёқатсиз шахсларни моддий таъминлашдан бўйин товлаш) назарда тутилган ҳуқуқбузарликни содир қилган деб топилиб, қарздор А.Ашуровага 5 сутка маъмурий қамоқ жазоси тайинланган.

Лекин шунга қарамасдан, қарздор А.Ашурова ўзига тегишли хулоса чиқариб олмасдан, 2020 йил ноябрь ойидан 2021 йил август ойига қадар, яъни 9 ой давомида 2 346 907 сўмлик алимент пулларини тўлашдан қасддан бўйин товлаб келган.

Бюронинг Гулистон шаҳар бўлими давлат ижрочисининг 2021 йил 1 августдаги «алимент қарзини ҳисоблаш тўғрисида»ги қарорига кўра, қарздор А.Ашурованинг алиментдан бўлган қарзи жами 36 ой давомида 15 376 477 сўмни ташкил қилган.

Мазкур жиноят иши юзасидан 2021 йил 18 август куни қарздор А.Ашуровага нисбатан Жиноят кодексининг 122-моддаси 1-қисми (вояга етмаган ёки меҳнатга лаёқатсиз шахсларни моддий таъминлашдан бўйин товлаш) билан айбланувчи тариқасида ишда иштирок этишга жалб қилинган.

Ушбу жиноят иши юзасидан айблов далолатномаси тузилиб, мазмунан кўриш учун жиноят ишлари бўйича Гулистон шаҳар судига юборилган.

ЖИБ Гулистон шаҳар судининг 2021 йил 6 октябрь кунидаги ҳукми билан А.Ашурова Жиноят кодексининг 122-моддаси 1-қисми билан айбли топилиб, 15 376 477 сўмни тўлиқ тўлаб беришлик мажбурияти билан 6 ой муддатга озодликдан чеклаш жазоси тайинланган.