Toshkent shahar hokimi Jahongir Ortiqxo‘jayev “Toshkent yoshlarni sevadi” festivali doirasida o‘tkaziladigan tadbirlar yuzasidan bo‘lib o‘tgan matbuot anjumanida yoshlarni qanday mukofotlar kutayotganini aytib o‘tdi, deb xabar bermoqda “Daryo” muxbiri.
Ma’lum qilinishicha, “Toshkent yoshlarni sevadi” festivali 15-noyabrdan 15-dekabrga qadar o‘tkaziladi. Forumning eng faol yoshlarining 10 nafariga Fransiyaning mashhur “Le Kordon Blyu” (Le Cordon Bleu) universitetiga 6-9 oylik o‘quv kurslarida o‘qish imkoniyati beriladi.
“Bundan keyin faol qatnashgan yoshlarga mukofotni mashina, uy-joylarga emas, chet elning kuchli universitetlarida ta’lim olib kelishga yo‘naltirsak hamma yoshlarga yoqsa kerak. Chet elning yuksak oliygohlarida o‘qib kelib, tajriba o‘rganib, O‘zbekistonga orttirgan tajribalarini olib kelishiga yo‘naltirsak yaxshi bo‘ladi.
Mashina ham tez buziladi, sotiladi. Orttirgan tajriba ularning o‘zi bilan qoladi. Dunyoning istagan universitetida o‘qishga imkoniyat yaratib berishga harakat qilishimiz kerak. Agar Toshkentni rivojlantirmoqchi bo‘lsak, faqat shu yo‘l bilan rivojlantirish imkoni bo‘ladi”, — deya ta’kidladi Toshkent shahar hokimi Jahongir Ortiqxo‘jayev.
Qayd etilishicha, loyiha va tadbirlarning amalga oshirilishi natijasida 200 mingdan ortiq yoshlarni jalb qilish va ularning bo‘sh vaqtlarini mazmunli tashkil etish rejalashtirilgan.
Eslatib o‘tamiz, Toshkentda 2020-yilda o‘tkazilgan yoshlar oyligi texnologiyalar, ta’lim, sport va madaniyat kabi to‘rtta yo‘nalishga bo‘lingan holda o‘tkazilgandi. Jahongir Ortiqxo‘jayev bir oylik tadbirlar uchun sovg‘alar berish, turli yutuqlarni qo‘yishga mahalliy budjet hisobidan 2 milliard so‘m ajratilganini, bundan tashqari hokimlik bir qancha homiylarni ham bu ishga jalb qilganini ma’lum qilgandi.
Izoh (0)