Qirg‘iziston aviakompaniyasi samolyoti Toshkent xalqaro aeroportiga favqulodda qo‘nishni amalga oshirdi. Bu haqda AviaSpotter Telegram kanali ma’lum qildi.
“9-noyabr kuni Qirg‘izistonning Sky KG aviakompaniyasining Diamond DA42 MNG samolyoti ekipaji tizimlar va yoritish moslamalarini tekshiruvidan o‘tkazish uchun qilgan parvozi chog‘ida o‘ng dvigatelning muzlagani haqida xabar berib, Islom Karimov nomidagi Toshkent xalqaro aeroportidan favqulodda qo‘nishga ruxsat so‘ragan”, — deyiladi xabarda.
Shundan so‘ng qo‘nish yo‘lagiga o‘t o‘chirish brigadasi chaqirilgan va samolyot aeroportga muvaffaqiyatli qo‘ndirilgan. O‘t o‘chiruvchilar samolyotning shassisida aniqlangan yong‘inni zudlik bilan o‘chirilgan.
Toshkent xalqaro aeroportining parvozlar bo‘yicha dispetcherlik guruhi hamda Qidiruv-qutqaruv xizmati xodimlarining muvofiqlashtirilgan va professional harakatlari natijasida hodisa tezda bartaraf etilgan, voqea oqibatida jabrlanganlar yo‘q.
Bundan avval Qozog‘istonda sholi dalalariga ishlov berayotgan samolyot halokatga uchragani, Rossiyaning Kamchatka o‘lkasida bortida 28 kishi bo‘lgan samolyot dengizga qulab tushgani hamda Islomoboddan Londonga uchayotgan samolyot yo‘lovchi ayolning o‘limi tufayli Toshkentga favqulodda qo‘ngani haqida xabar berilgandi.
Izoh (0)