Toshkentda bir qator tumanlarning gaz ta’minotini yaxshilashga yordam beradigan yangi gaz taqsimlash tarmog‘i qurilishi yakunlandi

Toshkentda gaz tarmoqlarining keng qamrovli rekonstruksiyasi yakunlandi, deb xabar bermoqda “Hududgazta’minot” matbuot xizmati.

Eslatib o‘tamiz, Toshkent shahrida gaz ta’minotini yaxshilashga xizmat qilishi aytilgan gaz quvurini qurish ishlari 2020-yil oxirlarida boshlangan edi.

“Diametri 1020 millimetr va uzunligi, taxminan, 8 kilometrga teng bo‘lgan gaz quvurining ishga tushirilishi poytaxt aholisi uchun katta voqea bo‘ldi. Bu kabi obyektni barpo etish ishlari O‘zbekistonda keyingi 40 yil ichida amalga oshirilmagan. Yangi yil arafasida boshlab yuborilgan qurilish bir necha oyda yakunlanishi kerak edi, lekin olib borilgan katta ma'rifiy ishlar hisobiga jarayon biroz murakkablashdi.

Xususan, ushbu obyekt qurilishiga norozi bo‘lgan fuqarolar bilan bir necha bor uchrashuvlar o‘tkazildi. Mutaxassislar ularga olib borilayotgan ishlarning mohiyatini va yangi obyektning afzalliklarini batafsil izohlab berdi”, — deyiladi xabarda.

Ma’lum qilinishicha, bugungi kunga kelib ushbu obyekt foydalanishga topshirildi. Toshkent gaz ta’minoti tizimi yagona halqaga ulanganligi tufayli, aholiga gaz uzatish samaradorligi sezilarli oshdi. Poytaxtda yashovchi qariyb 100 ming iste'molchilarning gaz ta’minoti yaxshilandi. O‘rikzor, Cho‘ponota, Oqtepa, Izza, Samarqand Darvoza, Zangiota, Suzuk ota, Novza va shu kabi boshqa yirik mahallarda gaz ta’minotidagi muammolar hal etildi.

Qish vaqtida tabiiy gaz ta'minotidagi uzilishlar Toshkent shahri Shayxontohur tumanidagi bir necha mahallarda kuzatilgan edi. Xususan, “Katta hovuz” MFY hududidagi 305 ta uylar yashovchilari keyingi bir necha yil davomida gaz ta'minoti tashkilotlariga gaz bosimining pastligi yuzasidan shikoyat qilib kelgan. Ushbu muammoning asosiy sababi 30 yildan ortiq ishlatib kelinayotgan va ancha eskirib qolgan gaz taqsimlash punktlariga taqaladi.

2021-yilda “Hududgazta’minot” Italiyaning Pietro Fiorentini kompaniyasi bilan hamkorlikda ushbu muammo mavjud hududda tajriba-sinov loyihasini amalga oshirishga kirishdi. Bu yerda real vaqt rejimida tabiiy gaz iste’molchilarga uzatilishining barqarorligi ustidan kuzatib turishga imkon yaratadigan to‘rtta zamonaviy gaz taqsimlash punktlari o‘rnatildi.

Bunday yangi tajriba natijalari bo‘yicha zamonaviy GTPlarni Toshkentning boshqa tumanlarida ham o‘rnatish rejalashtirilayotgani qayd etilgan.