O‘zbekiston Markaziy banki aholining turli guruhlari iste’mol kayfiyatini o‘rganish bo‘yicha navbatdagi so‘rovlari sharhini e’lon qildi.
Ushbu o‘rganishga respondentlarning daromadlari va xarajatlari tarkibi, mavjud pul-mablag‘larini jamg‘arishga bo‘lgan moyilligi, shuningdek, ularning kelgusida kreditga bo‘lgan ehtiyojlarini aniqlash va tahlil qilish bo‘yicha savollar kiritilgan.
So‘rov davomida ishtirokchilarning qariyb 70 foizi daromadlarining asosiy manbai oylik ish haqqi, 15 foizga yaqini esa tadbirkorlik faoliyatidan olinadigan daromadlarga to‘g‘ri kelishini ta’kidlagan. Xorijdan pul o‘tkazmalarni qayd etgan respondentlar ulushi esa 3,4 foizga teng.
Shuningdek, hududlar kesimida ham rasmiy oylik ish haqqi asosiy daromad manbai ekanligini ko‘rish mumkin. Xususan, Toshkent shahri (68,8 foiz), Buxoro (61 foiz), Andijon (58,7 foiz) va Toshkent viloyatlari (58,1 foiz) respondentlari javoblarida oylik maoshning asosiy daromad sifatida yuqori ulushi qayd etilgan.
Tadbirkorlik faoliyati shug‘ullanishni qayd etgan respondentlarning katta qismi Navoiy, Qoraqalpog‘iston Respublikasi, Jizzax, Namangan va Xorazm viloyatlari hissasiga to‘g‘ri kelgan.
So‘rov natijalariga ko‘ra, jami respondentlarning katta qismi, ya’ni 60 foizi kelgusi oylarda yangi kredit olishga ehtiyojlari mavjudligi ta’kidlagan.
2021-yilning II choragida respondentlarning daromadi 1−3 million so‘m tashkil etuvchi qismi kreditga bo‘lgan talabi yuqoriligi qayd etishgan bo‘lsa, III chorakda 3−5 million so‘m va 5−7 million so‘m daromadli respondentlarda ham kreditlarga bo‘lgan ehtiyoji sezilarli ortgani kuzatilgan.
O‘rganishlarga ko‘ra, 52 foizga yaqin respondentlar kelgusi davr uchun jamg‘armalari ko‘payishini ta’kidlagan. Ushbu ko‘rsatkich o‘tgan II chorak natijalari bilan solishtirilganda, ijobiy javoblarhissasi 6 foiz bandga yaxshilangan.
Qayd etilishicha tijorat banklari tomonidan taklif etilayotgan jozibador depozit turlari va ulardagi yuqori daromadlilik, aholining bo‘sh pul mablag‘larini jamg‘arish hamda omonatga yo‘naltirishni qo‘llab-quvvatlovchi asosiy omillardan bo‘lib xizmat qilmoqda.
Avvalroq Markaziy bank kelgusi 3 yilda O‘zbekiston iqtisodiyotini rivojlantirishning ikki ssenariysini e’lon qilgani, O‘zbekistonda jismoniy shaxslarning muammoli kreditlari hajmi yil boshidan buyon 5,4 baravarga oshgani to‘g‘risida e’lon qilingandi.
Izoh (0)