Prezident Shavkat Mirziyoyev raisligida yurak qon-tomir va endokrin kasalliklarning oldini olish va ularni davolash tizimini takomillashtirishga bag‘ishlangan videoselektor yig‘ilishi bo‘lib o‘tdi.
Prezident kardiologiya sohasidagi muammoli masalalar to‘g‘risida gapirib o‘tdi. Xususan, davlat rahbarining ta’kidlashicha yurak-qon tomir kasalliklari so‘nggi 5 yilda ko‘paygan.
“30-70 yoshdagi aholi o‘rtasida o‘lim holatlarining 53 foizi hanuzgacha yurak-qon tomir kasalliklariga to‘g‘ri kelmoqda.
So‘nggi besh yilda yurak-qon tomir kasalliklari 20 foizga, hatto yoshlar orasida ham ko‘paygan. 40 yoshdan yuqori aholining 20-25 foizida gipertoniya alomatlari mavjud.
Umuman, o‘tkazilgan xatlovlar natijasiga ko‘ra, respublika bo‘yicha 4 millionga yaqin aholi orasida yurak-qon tomir kasalliklari aniqlangan bo‘lib, umumiy aholining 12 foizini tashkil etadi.
Ayniqsa, bunday kasalliklarga chalingan aholi soni Namanganda – 18 foiz (450 ming nafar), Farg‘onada – 17 foiz (600 ming), Buxoroda – 14 foiz (230 ming), Qashqadaryoda – 13 foiz (470 ming)ni tashkil etib, respublika ko‘rsatkichidan yuqori.
Toshkent shahri, Buxoro, Navoiy va Toshkent viloyatlarida yurak-qon tomir kasalliklarining og‘ir asoratlari qolgan hududlarga nisbatan baland”, – deydi Shavkat Mirziyoyev.
Prezidentning ma’lum qilishicha, yuqorida ko‘rsatilgan muammolarni hal etish, yurak-qon tomir kasalliklarini barvaqt aniqlash, ularning oldini olish va davolash bo‘yicha dastur ishlab chiqilib, mutlaqo yangi tizim joriy qilinadi.
Xususan, quyidagi choralar ko‘rilishi belgilandi:
- kelgusi yildan 40 yoshdan oshgan barcha aholi (10 million nafar) oilaviy poliklinika va tibbiy brigadalar orqali yiliga kamida bir marta manzilli skriningdan o‘tkaziladi;
- tuman laboratoriyalari koagulometr va zarur reaktivlar bilan ta’minlanadi;
- yurak-qon tomir kasalliklar aniqlangan aholining yagona elektron reyestri yuritiladi;
- yurak-qon tomir kasalliklari uchun enalapril kabi dorilar doimiy ravishda 200 mingdan ziyod ehtiyojmand aholiga bepul tarqatiladi;
- tumanlardagi har bir mahallada “gipertoniya salomatlik maktablari”ni tashkil etiladi;
- oilaviy shifokor punktlari va poliklinikalarda hamshiralarning vazifalari ham qayta ko‘rib chiqilib, ularning funksiyalari kengaytiriladi.
Unga ko‘ra, birlamchi bo‘g‘inga dori va tibbiy buyumlar uchun kelgusi yilda budjetdan 580 milliard so‘m beriladi. Bu 2021-yil xarajatlaridan 3 barobar ko‘p. 14 mingdan ziyod tibbiyot brigadalari va oilaviy shifokorlar yurak kasalliklarini barvaqt aniqlash va birlamchi yordam ko‘rsatishga o‘qitiladi.
Shuningdek, 2022-yil yakunigacha barcha oilaviy shifokor punktlari va poliklinikalarda hamshira ko‘rik xonasi tashkil qilinadi. 2022-yil davomida malaka oshirish markazlarida 15 ming nafar hamshiraning maxsus onlayn kurslarda o‘qitilishi ta’minlanadi.
Bundan tashqari, tuman shifoxonalariga 4 turdagi kardiologiya uskunalari o‘rnatilib (EKG, ExoKG, xolter-monitor va defibrillyator), ko‘rsatiladigan xizmatlar 5 tadan 15 taga oshiriladi. Buning uchun qo‘shimcha 60 milliard so‘m yo‘naltiriladi.
Bundan avval O‘zbekistonda “1hls.uz” mobil ilovasi qayta ishga tushirilishi va takomillashtirilishi, Shavkat Mirziyoyev Aydar–Arnasoy ko‘llar tizimida ekologik barqarorlikni saqlash va ekoturizmni rivojlantirish masalalari bo‘yicha yig‘ilish o‘tkazgani haqida xabar berilgandi.
Izoh (0)