Andijonda 18 yoshli yigit kanalga oqizib yuborilgani aytilayotgan xabar yuzasidan jinoyat ishi qo‘zg‘atildi

Bosh prokuratura ijtimoiy tarmoqlarda 18 yoshli yigit kaltaklanib, kanalga tashlab yuborilgani to‘g‘risida tarqalgan xabarlar yuzasidan ma’lumot berdi.

Ijtimoiy tarmoqlarda viloyatning Baliqchi tumanida 25 yoshli fuqaro unashtirilgan qizi 2003-yilda tug‘ilgan yigit bilan unashtiruvdan keyin ham uchrashib yurganini bilgach, o‘sha yigitni urib, kanalga tashlab yuborgani to‘g‘risida xabar tarqaldi.

Idora matbuot xizmatining ma’lum qilishicha, 5-noyabr kuni fuqaro L.Z. yashash xonadonidan noma’lum tomonga chiqib ketib, bedarak yo‘qolgan.

Mazkur holatda L.Z. qotillik qurboni bo‘lishi mumkinligi inobatga olinib, ushbu holatni kelgusida tergov yo‘li bilan tekshirish, aniqlik kiritish maqsadida 7-noyabr kuni Jinoyat kodeksning 97-moddasi (qasddan odam o‘ldirish) bilan jinoyat ishi qo‘zg‘atilgan.

Hozirda tuman prokuraturasi tomonidan dastlabki tergov harakatlarini o‘tkazish bilan bir qatorda, bedarak yo‘qolgan L.Z.ni topish yuzasidan barcha tezkor-qidiruv tadbirlari amalga oshirilmoqda. Tergov natijasi yuzasidan qo‘shimcha xabar qilinadi.

Avvalroq Samarqandda tanishini o‘ldirib, murdani hovlidagi xandaqqa ko‘mib qo‘ygan shaxs 18 yilga qamalgani, Samarqandlik yigit sevgan qizi, uning singlisi, opasi va onasini pichoqlagani to‘g‘risida xabar berilgandi.