Shahrisabzlik ayol ko‘chada yashab kelayotganini, mas’ullar e’tibor qaratmaganini aytgandi. Hokimlik holatga munosabat bildirdi

Qashqadaryo viloyatining Shahrisabz shahrida yashovchi 49 yoshli Zamira Gubiyeva uysiz ekanini, ancha vaqtdan beri jamoatchilik maskanida yashab kelayotganini ma’lum qilib, mas’ullar bu holatga e’tibor qaratmayotganini bildirgandi. Shahar hokimligi axborot xizmati mazkur muammoni o‘rganib chiqqanini ma’lum qildi.

Videoni Telegram orqali jamoatchilik bilan bo‘lishgan muallif uysiz ekanini aytgan Zamira opa Shahrisabz shahrining “Do‘stlik” mahalla fuqarolar yig‘inida yashashini, anchadan beri uni jamoatchilik maskani bo‘lgan uychaga kirib-chiqib yurganini aytadi.

“Asli Shahrisabz shahridagi kinoteatr oldida tug‘ilganman. Ismim Zamira Gubiyeva. Anchadan beri shu yerda yashayman. Judayam sovuq, imkonsizlikdan shu yerda yashayapman. Yiqilib tushib, oyog‘im jarohat olgan. Issiqda ko‘chada qolib ketganman. Domimni tortib olishganidan so‘ng, ko‘chada qolganman”, — deydi ko‘chada qolganini aytgan ayol.

Ayolning aytishicha, mazkur holatdan xabar topgan IIB xodimlari uni shifoxonaga yotqizgan.

“Men ham odamman-ku, hech kim e’tibor bermayapti. Yosh bolalar esa meni qo‘rqitmoqda”, — deydi ayol.

Mazkur voqeaga munosabat bildirgan Shahrisabz shahar hokimligi axborot xizmati ayolning yashash uyi borligini, ayol uyiga qaytarilganini bildirdi.

“Zamira opa bilan suhbatlashganimizda u kishining o‘g‘li uydan ishlash uchun chiqib ketib, olti yildan buyon darak bermayotgani ma’lum bo‘ldi. Opa o‘g‘lining o‘sha joyda uylanganini kimlardandir eshitib, ancha payt yig‘lab kasal bo‘lib qolganini aytdi. O‘g‘lini kutib yashagan Zamira opa ko‘chaga chiqib, spirtli ichimlik iste’mol qilishga odatlanib qolgan. Natijada Zamiraga yaqin qarindoshlari ham begonadek qarashgan. Bir necha bor mahalla faollari tomonidan yordam va tushuntirish ishlari olib borilishiga qaramasdan opa o‘z bilganidan qolmagan.

Bu holat yuzasidan Shahrisabz shahar hokimi rahbarligida ishchi guruhi tuzildi. Zamira yashash uyiga qaytarildi. Barcha holatlar o‘rganilib, tahlil etildi”, — deyiladi hokimlik axborot xizmati munosabatida.

Qo‘shimcha qilinishicha, vaziyat hokim tomonidan o‘rganilgach, mahalla fuqarolar yig‘ini raisi, o‘rinbosari, profilaktika inspektori ushbu muammoga o‘z vaqtida yechim topmagani uchun ogohlantirish olgan.

“Zamira opa hozir qilgan ishidan pushaymon, yaxshi yashashga, spirtli ichimlik ichmaslikka, mehnat qilib, halol pul topishga qaror qildi”, — deyiladi hokimlik mas’ullari munosabatida.

Qayd etilishicha, hokimlik Zamira opaning o‘g‘lini xorijdan onasi bag‘riga qaytarish choralarini ko‘rmoqda.