Muborak tumani hokimi o‘zi va sektor rahbarlari bir oylik maoshini yetim bolalarga hadya qilmoqchiligini ma’lum qildi
Muborak tumani hokimi Akrom Aripov o‘zi va tumandagi sektor rahbarlari bir oylik maoshini yetim bolalarga hadya qilmoqchiligini ma’lum qildi. Bu haqda tuman hokimi bilan bo‘lgan matbuot anjumanida ma’lum qilindi, deya xabar berdi “Daryo” muxbiri.
Qayd etilishicha, viloyatda faoliyat yurituvchi jurnalist va blogerlar uchun Muborak tumanida tashkil etilgan press-tur davomida bo‘lib o‘tgan matbuot anjumanida so‘z olgan hokim Akrom Aripov tumanda 7 nafar yetim fuqarolarga bepul uy-joylar topshirilganini, shuningdek,hokim boshchiligidagi sektor rahbarlari bir oylik maoshini ularga hadya qilmoqchiligini ma’lum qilgan.
“Yetti nafar ota-ona qaramog‘idan mahrum bo‘lgan fuqarolarni uy-joy bilan ta’minladik. Shuningdek, ko‘plab tadbirkorlar taklifini inobatga olib, shaxsan o‘zim va sektor rahbarlari namuna sifatida tadbirkorlarga qo‘shilib, bir oylik maoshimizni aynan shu fuqarolarga yordam tariqasida hadya qilmoqchimiz. Bu haqda Xalq deputatlari tuman Kengashi deputatlariga taklif kirityapmiz”, — deydi Akrom Aripov.
“Daryo” muxbirining ayrim manbalarga tayanib yozishicha, tuman hokimlari 8-10 million atrofida maosh olsa, sektor rahbarlari — tuman prokurori, IIB boshlig‘i va tuman soliq inspeksiyasi rahbari 7-8 million so‘m atrofida maosh oladi.
Eslatib o‘tamiz, avvalroq G‘uzor tumani hokimi Bekzod Suyunov hokim sifatidagi birinchi maoshini, shuningdek, sektor rahbari sifatidagi 5 million so‘m pul mukofotini ham uysiz ayolga hadya qilgani xabar berilgandi.
