Navoiy xalqaro aeroportida odamlar to‘plangani haqida xabar tarqaldi. Holat yuzasidan Uzbekistan Airports rasmiy xabar berdi.
Qayd etilishicha, 2021-yilning 8-noyabr kuni tushdan keyin Rossiyaning IFly aviakompaniyasi tomonidan Navoiy–Moskva va Navoiy–Sankt-Peterburg yo‘nalishlari bo‘yicha parvoz qilish niyatida yo‘lovchilar Navoiy xalqaro aeroportiga kela boshlagani. Biroq bu reyslar jadvalda bo‘lmagan.
Yo‘lovchilarning so‘zlariga ko‘ra, ular aviachiptalarni “Vostok Buxoro” kompaniyasining Samarqand, Buxoro va Urganch shaharlarida joylashgan turli filiallaridan xarid qilgan. Mahalliy vaqt bilan soat 18:00 ga kelib, aeroportda 200 ga yaqin odam to‘plangan.
Navoiy aeroporti xodimlari chiptalarni sotgan kompaniya bilan bog‘lanib, yo‘lovchilarga kerakli ma’lumotlarni yetkazishni va vaziyatni bartaraf etishni talab qilgan. Kompaniya vakillari barcha yo‘lovchilarga chipta pullari qaytarilishini ma’lum qilgan. Ayni damda yo‘lovchilar terminal binosini tark etgan.
Ma’lum qilinishicha, Uzbekistan Airports’ning aviachiptalar savdosiga hech qanday aloqasi yo‘q.
Reysi jadvalda yo‘q odamlarning aeroportga to‘planish holati 6 kun ichida uchinchi bora takrorlandi. Bundan avval holat 3-noyabr kuni Toshkent xalqaro aeroportida va 5-noyabr kuni Urganch aeroportida qayd etilgandi.
Izoh (0)