Ekoqo‘mita 10-dekabrgacha O‘zbekiston viloyatlari bo‘ylab qaysi turdagi daraxtlar ekilishi bo‘yicha ma’lumot berdi

Ekologiya va atrof-muhitni muhofaza qilish qo‘mitasi “Dolzarb 40 kunlik” doirasida O‘zbekiston viloyatlarida qaysi turdagi daraxtlar ekilishi bo‘yicha ma’lumot berdi, deb yozadi “Xalq so‘zi online”.

Xususan, Qoraqalpog‘iston hududiga katalpa, pavlovniya, yapon saforasi, qayrag‘och, tut va akatsiya daratlari ekiladi. Jizzax, Namangan, Samarqand, Farg‘ona va Toshkentda chinor, eman, zarang va boshqa daraxtlar ekiladi.

Mutaxassislarning aytishicha, O‘zbekiston hududlarida ekish uchun 27 turdagi daraxt ko‘chatlari taklif etilmoqda. Jumladan, kashtan, oqqayin, eman, yapon saforasi, shumtol, qayrag‘och, pavloniya, terak, akatsiya, chinor, tut, jiyda, yong‘oq, behi, uzum, qrim qarag‘ayi va virgin archasi.

O‘zbekistonda 2-noyabrdan 10-dekabrga qadar daraxt ekish bo‘yicha “Dolzarb 40 kunlik” e’lon qilingan. Ushbu vaqt mobaynida viloyatlarda bir necha million tup ko‘chatlar ekish rejalashtirilgan.

Eslatib o‘tamiz, Prezident Shavkat Mirziyoyev raisligida 2-noyabr kuni aholini uy-joy bilan ta’minlash hamda yashil maydonlarni kengaytirish chora-tadbirlari muhokamasi yuzasidan videoselektor yig‘ilishi o‘tkazilgandi. Yig‘ilishda 10-dekabrga qadar daraxt ekish bo‘yicha “Dolzarb 40 kunlik” e’lon qilingan. O‘rmon xo‘jaligi davlat qo‘mitasiga hokimlar bilan birga, har bir hududning iqlim sharoitiga mos ko‘chatlarni ko‘paytirish va yetkazib berish vazifasi qo‘yilgan edi.