Andijon viloyatida 2021-yilning o‘tgan davrida yoshlar o‘rtasida sodir etilgan jinoyatlar soni o‘tgan yilga nisbatan 565 taga ko‘paygan. Bu haqida viloyat sudi tomonida o‘tkazilgan matbuot anjumanida ma’lum qilindi, deya xabar qilmoqda “Xalq so‘zi online”.
Qayd etilishicha, hududlar kesimida o‘rganilganida, yoshlar o‘rtasida jinoyatlar soni ortishi asosan Andijon shahar, Andijon, Asaka, Izboskan, Qo‘rg‘ontepa, Marhamat, Xo‘jaobod va Shahrixon tumanlarida kuzatilgan.
“Aslida jinoyat qaysi hududda sodir etilishidan qat’iy nazar, uning oldini olish chorasini ko‘rish juda muhimdir. Sababi, har bir qonunbuzarlik ortida bir yoki bir necha inson taqdiri turadi. Har bir jinoyatchining xatti-harakati bevosita uning oila a’zolari va yaqinlari ruhiyatiga salbiy ta’sir ko‘rsatadi. Shunday ekan, jinoyatlarning sonidan ham ko‘ra ularning mavjudligi achinarlidir” – deydi Andijon viloyat sudi raisi o‘rinbosari, jinoyat ishlari bo‘yicha sudlov hay’ati raisi Farhod G‘aniyev.
Tahlillar shuni ko‘rsatmoqdaki, viloyat miqyosida jinoyatlar soni aksariyat yo‘nalishlarda keskin ortgan. Masalan, xotin-qizlar o‘rtasidagi jinoyatchilik 151 taga, voyaga yetmaganlar tomonidan sodir etilgan jinoyatlar soni 37 taga, 60 yoshdan oshgan erkaklar jinoyatlari soni 18 taga ko‘paygan.
Bu holatlar asosan Andijon shahri, Asaka, Andijon, Qo‘rg‘ontepa, Shahrixon, Marhamat, Bo‘ston tumanlariga to‘g‘ri kelishini hisobga olinsa, ushbu hududlarda jinoyatchilikning oldini olish va unga qarshi kurashish borasidagi ishlarni jonlantirish dolzarb vazifaga aylanganini ko‘rish mumkin, deyiladi xabarda.
Xabarda 2020-yili jinoyatchilik soni qancha bo‘lgani haqida ma’lumot berilmagan.
Bundan avval Toshkentda 2021-yilning dastlabki 9 oyida qancha jinoyatlar sodir etilgani hamda O‘zbekistonda 2020-yilda voyaga yetmaganlarning 500 nafardan ortig‘i o‘z joniga qasd qilgani haqida xabar qilingandi.
Izoh (0)