Ijtimoiy tarmoqlarda Toshkent aeroportida odamlar to‘plangani aks etgan videolavha tarqaldi. Holat yuzasidan Uzbekistan Airports kompaniyasi matbuot xizmati izoh berdi.
Qayd etilishicha, Toshkent–Istanbul yo‘nalishi bo‘yicha Uzbekistan Airways reysida uchish niyatida 200 ga yaqin kishi aeroportga kelgan. Biroq bu reys jadvalda bo‘lmagan. Yo‘lovchilar chiptalarni Asia Luxe Travel orqali sotib olishganini ma’lum qilgan.
Uzbekistan Airways vakillarining ma’lum qilishicha, sayyohlik kompaniyasi aviachiptalar savdosini aviakompaniya bilan slotni (aeroportdagi parvoz uchun ajratilgan vaqt) kelishmagan holda tashkil qilgan. Dastlabki ma’lumotlarga ko‘ra, reys uchun 200 ga yaqin aviachipta sotilgan.
“Sayyohlik kompaniyasi yo‘lovchilarga suv tarqatdi va ularni mehmonxonaga jo‘natish uchun transport tashkil qildi. Biroq odamlar terminal binosini tark etishdan bosh tortdilar. O‘zbekiston Transport vazirligi tashabbusi bilan zaxira havo kemasi ajratilib, parvozga yo‘lovchilarni ro‘yxatga olish boshlandi”, – Uzbekistan Airports xabarida.
Shuningdek, holat yuzasidan Asia Luxe Travel kompaniyasi ham izoh berdi.
“Istanbulga uchayotgan reys ruxsat beruvchi hujjatlarni olish jarayoni cho‘zilib ketgani sababli ushlanib qoldi.
Turoperator mehmonxonalargacha bepul yetkazib qo‘yishni tashkil etdi, kompaniya vakillari suv tarqatdi, yo‘lovchilar uchun bepul tushlik tashkil etildi, deya qayd etdi kompaniya.
Istanbul samolyoti mahalliy vaqt bilan 20:30 da uchib ketgan. Barcha yo‘lovchilar reysdan joy oldi, deya qo‘shimcha qildi kompaniya.
Noqulaylik uchun chin dildan uzr so‘raymiz”, — deyiladi Asia Luxe Travel kompaniyasi izohida.
Izoh (0)