Тошкент аэропортида рейси жадвалда бўлмаган 200 нафар йўловчи тўпланди

Ижтимоий тармоқларда Тошкент аэропортида одамлар тўплангани акс этган видеолавҳа тарқалди. Ҳолат юзасидан Uzbekistan Airports компанияси матбуот хизмати изоҳ берди.

Қайд этилишича, Тошкент–Истанбул йўналиши бўйича Uzbekistan Airways рейсида учиш ниятида 200 га яқин киши аэропортга келган. Бироқ бу рейс жадвалда бўлмаган. Йўловчилар чипталарни Asia Luxe Travel орқали сотиб олишганини маълум қилган.

Uzbekistan Airways вакилларининг маълум қилишича, сайёҳлик компанияси авиачипталар савдосини авиакомпания билан слотни (аэропортдаги парвоз учун ажратилган вақт) келишмаган ҳолда ташкил қилган. Дастлабки маълумотларга кўра, рейс учун 200 га яқин авиачипта сотилган.

«Сайёҳлик компанияси йўловчиларга сув тарқатди ва уларни меҳмонхонага жўнатиш учун транспорт ташкил қилди. Бироқ одамлар терминал биносини тарк этишдан бош тортдилар. Ўзбекистон Транспорт вазирлиги ташаббуси билан захира ҳаво кемаси ажратилиб, парвозга йўловчиларни рўйхатга олиш бошланди», – Uzbekistan Airports хабарида.

Шунингдек, ҳолат юзасидан Asia Luxe Travel компанияси ҳам изоҳ берди.

«Истанбулга учаётган рейс рухсат берувчи ҳужжатларни олиш жараёни чўзилиб кетгани сабабли ушланиб қолди.

Туроператор меҳмонхоналаргача бепул етказиб қўйишни ташкил этди, компания вакиллари сув тарқатди, йўловчилар учун бепул тушлик ташкил этилди, дея қайд этди компания.

Истанбул самолёти маҳаллий вақт билан 20:30 да учиб кетган. Барча йўловчилар рейсдан жой олди, дея қўшимча қилди компания.

Ноқулайлик учун чин дилдан узр сўраймиз», — дейилади Asia Luxe Travel компанияси изоҳида.