Qarshidan Moskvaga uchadigan samolyot dvigateli issiq ob-havo sababli ishlamay qoldi
Ijtimoiy tarmoqlarda Qarshi aeroportida turgan samolyotda yo‘lovchilar bir yarim soat davomida turib qolgani, ularga havo yetishmay, ikki nafarining tobi qochgani aytilgan video tarqaldi.
“Nigoh” kanalining ma’lum qilishicha, parvoz Rossiyaning Royal Flight aviakompaniyasi tomonidan amalga oshirilgan. Yo‘lovchilar bortga chiqarilgandan so‘ng samolyot dvigatellari ishlamay qolgan. Bunga ob-havo sharoiti, ya’ni havo haroratining 44 darajadan yuqori bo‘lishi sabab bo‘lgan.
Natijada ushbu parvozni tungi vaqtda amalga oshirish qarori qabul qilinib, yo‘lovchilar bortni tark etgan. Yo‘lovchilarning sog‘lig‘i yomonlashgani haqida xabar kelib tushmagan.
Holat yuzasidan Transport vazirligi matbuot xizmati rasmiy ma’lumot berdi. Qayd etilishicha, 5-iyun kuni Rossiyaning Royal Flight aviakompaniyasi Qarshi xalqaro aeroportidan ABG-2604 Qarshi—Domodedovo reysini amalga oshirishi lozim bo‘lgan. Shu kuni soat 13:32 da Royal Flightning Boeing-767-300 rusumli samolyoti Qarshi xalqaro aeroportiga kelib qo‘ngan va aeroport tomonidan barcha texnik va servis xizmatlari ko‘rsatilgach, soat 16:10 da barcha yo‘lovchilar samolyotga chiqib bo‘lgan.
“Biroq respublikada kuzatilayotgan issiq tufayli samolyotning asosiy va qo‘shimcha dvigatellari qo‘shilmay qoldi. Samolyot kompyuteri parametrlarini qayta terish va bir necha bor dvigatellarni qo‘shishga qayta urinishlar ham issiqning haddan ziyod kuchayishi oqibatida samara bermadi. Asosiy va qo‘shimcha dvigatellarni ishga tushirish imkoni bo‘lmagach, tabiiyki, samolyotning konditsioner tizimi ham ishlamadi.
Shu o‘rinda ta’kidlash lozimki, xalqaro fuqaro aviatsiyasi qoidalariga ko‘ra, yo‘lovchilar samolyotga chiqarilib, havo kemasi eshiklari yopilgach, yo‘lovchilar xavfsizligi bo‘yicha barcha qarorlar samolyot ekipaji komandiri tomonidan qabul qilinadi. Ekipaj komandiri yo‘lovchilarni tushirish haqida qaror qabul qilgach, yo‘lovchilar samolyotdan zudlik bilan tushirildi. Qarshi xalqaro aeroporti tomonidan yo‘lovchilar uchun aerovokzalda barcha zarur sharoitlar yaratib berildi”, — deyiladi vazirlik xabarida.
Samolyot 6-iyun kuni soat 04:54 da belgilangan manzilga jo‘nab ketgan va 329 nafar yo‘lovchi Domodedovo aeroportiga sog‘-salomat eltib qo‘yilgan.
Eslatib o‘tamiz, “O‘zgidromet” 5-iyun kuni Qashqadaryoda 46 darajagacha issiq bo‘lishini ma’lum qilgandi.
