Mirobod tumani IIO FMB xodimlari giyohvandlik vositalarini tarqatishga qarshi kurashga yo‘naltirilgan profilaktik tadbirlar davomida reklama flayerlarini tarqatish bilan shug‘ullangan shaxsni qo‘lga oldi, deb xabar beradi Toshkent shahar IIBB axborot xizmati.
Ma’lum qilinishicha, 26 yoshli Sh.Sh.dan ashyoviy dalillar sifatida 1093 ta giyohvandlik vositalari savdosi bilan shug‘ullanuvchi internet-do‘konlarni reklama qiluvchi flayerlar olib qo‘yilgan. Suhbat davomida Sh.Sh. Telegram orqali unga o‘zini F. deb tanishtirgan shaxs bog‘lanib, flayerlar tarqatish yo‘li bilan daromad taklif qilganini bildirgan.
29-oktabr kuni F. ismli shaxs Sh.Sh.ga 1750-1800 ta flayerni bergan. Flayerlarning bir qismi Yashnobod va Mirobod tumanlarida tarqatilgan.
Keyinchalik tergov oldi tekshiruvi davomida 2003-yilda tug‘ilgan F.K. qo‘lga olingan. F.K.ning ma’lum qilishicha, 2021-yilning sentabr oyida u maxsus sayt orqali flayerlar tarqatish bilan bog‘liq “ish topgan”. Flayerlarni u tayyor holda Mirzo Ulug‘bek tumanidagi bosmaxonadan olgan.
Tez orada bosmaxona ishchilari — 23 yoshli R.R. va 36 yoshli D.X. qo‘lga olingan. Ashyoviy dalillar sifatida 6000 ta tayyor flayerlar olib qo‘yilgan. Mazkur fakt asosida to‘plangan hujjatlar Mirobod tumani IIO FMBga yo‘naltirilgan.
Eslatib o‘tamiz, so‘nggi yillarda giyohvand moddalar to‘g‘risida reklama vaqti-vaqti bilan Toshkentning turli tumanlarida paydo bo‘layotgani haqida xabar berilgan edi. Xususan, Toshkentdagi uylar devorida giyohvand moddalar reklamasi yozuvlarini qoldirish bilan shug‘ullangan ikki yigit 6-aprel kuni ushlangandi.
Izoh (0)