Rossiya Afg‘onistonning etnosiyosiy kuchlarini mamlakatda ichki milliy nizo qo‘zg‘atuvchi harakatlardan tiyilishga chaqiradi. Bu haqda 3-noyabr kuni bo‘lib o‘tgan brifingda Rossiya Tashqi Ishlar Vazirligi rasmiy vakili Mariya Zaxarova ma’lum qildi.
“Bizning fikrimizcha, hozirgi bosqichda mamlakatning turli etnosiyosiy kuchlari afg‘onlararo nizoni qo‘zg‘atuvchi xatti-harakatlardan tiyilishi kerak”, — dedi u Milliy qarshilik frontining “Tolibon” bilan jangovar harakatlarni qayta boshlashga tayyorligi haqidagi ma’lumotga fikr bildirar ekan.
Zaxarovaning ta’kidlashicha, ziddiyat tomonlari “Afg‘oniston va uning atrofidagi mintaqada barqaror tinchlik, barqarorlik va xavfsizlikni tiklash uchun o‘zaro tushunish va milliy yarashuv yo‘llarini ham izlashi kerak”.
U, shuningdek, 2-noyabr kuni IShID tomonidan Kobuldagi harbiy gospitalda sodir etilgan, natijada 20 ga yaqin odam halok bo‘lib, 40 dan ortiq fuqaro jarohatlangan teraktni qoraladi.
Shu bilan birga, u Afg‘oniston muvaqqat hukumati tomonidan normal tinch hayot o‘rnatish uchun xavfsizlikni ta’minlash borasida amalga oshirilayotgan sa’y-harakatlarni qayd etdi.
“Sharqiy Nangarhor viloyatida IShIDning 60 dan ortiq jangarisi qurollarini tashlab, ‘Tolibon’ rasmiylariga taslim bo‘ldi. G‘arbning afg‘on milliy aktivlarini muzlatib qo‘yishiga qaramay, mamlakat Markaziy banki foyda va zararlarni bank omonatchilari va qarz oluvchilar o‘rtasida taqsimlashni, kreditlar va garov ta’minoti bo‘yicha foizlar olinmasligini ko‘zda tutuvchi islomiy bank tizimini joriy etish rejalari va boshqa tafsilotlar to‘g‘risida e’lon qildi ”, — dedi Mariya Zaxarova.
Avvalroq “Tolibon” harakati Rossiya prezidenti Vladimir Putinning harakat yetakchilarini terrorchilar safidan chiqarish ehtimoli haqidagi bayonotini olqishlagan edi. Putin Afg‘onistondagi vaziyatning rivojlanishiga qarab, birdamlikda ularni terrorchilar ro‘yxatidan chiqarish to‘g‘risida qaror qabul qilinishini aytgan.
Bunga qadar Putin “Tolibon” uchun narkobiznesdan tushadigan daromaddan voz kechish oson bo‘lmasligini ham aytgan. “Afg‘oniston dunyodagi eng yirik afyun ta’minotchisi bo‘lib qolmoqda. Giyohvand moddalar yetishtirishga qarshi kurashishni va’da qilganiga qaramay, ‘Tolibon’ aslida buni uddalayaptimi, o‘zi bu bilan shug‘ullanyaptimi yoki shug‘ullanishni istamayaptimi, menga qorong‘i. Bugun, ayniqsa, iqtisodiyotdagi inqirozli vaziyatda bunday daromad manbaidan voz kechish oson bo‘lmaydi ”, — dedi Putin 15-oktabr kun bo‘lib o‘tgan Mustaqil Davlatlar Hamdo‘stligi sammitida.
Rossiya prezidenti, shuningdek, “Tolibon” bilan muloqot qilish zarurligini, lekin ularni tan olishga shoshilmaslik kerakligini bildirgan.
Izoh (0)