Farg‘ona viloyati Furqat tumanida “Jiguli” va Nexia-2 ishtirokida sodir bo‘lgan yo‘l-transport hodisasi oqibatida to‘rt kishi halok bo‘ldi. Bu haqda “Daryo”ga viloyat IIB YHXB axborot xizmati ma’lum qildi.
Qayd etilishicha, mazkur yo‘l-transport hodisasi 1-noyabr kuni soat 22:00 larda Furqat tumani Qo‘qonboy qishlog‘i hududida sodir bo‘lgan. A-376 Qo‘qon—Jizzax avtomobil yo‘lining 10-kilometrida 1992-yilda tug‘ilgan N.D. boshqaruvidagi Nexia-2 qarama-qarshi yo‘nalishga chiqib, 1985-yilda tug‘ilgan Yu.M. boshqaruvidagi VAZ-2105 (“Jiguli”) bilan to‘qnashgan.
Oqibatda Nexia-2 haydovchisi N.D. va yo‘lovchisi R.O. tan jarohati olib, hodisa joyida, yana ikki yo‘lovchi — R.K. va M.G‘. esa shifoxonada vafot etgan. “Jiguli” haydovchisi va ikki nafar yo‘lovchi Furqat tuman shifoxonasining jonlantirish bo‘limiga yotqizilgan.
Mazkur holat yuzasidan Furqat tuman IIB huzuridagi tergov bo‘limi tomonidan Jinoyat kodeksining 266-moddasi 3-qismi “a” (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bandi bilan jinoyat ishi qo‘zg‘atilib, tergov harakatlari davom etmoqda.
Izoh (0)