Buxoroda fuqarolar noroziligiga sabab bo‘lgan 197 nafar mansabdor ma’muriy javobgarlikka tortildi

Buxoro viloyatida aholiga xizmat ko‘rsatishda qonunbuzilish holatlarini sodir etib, fuqarolarning noroziligiga sabab bo‘lgan 197 nafar davlat tashkiloti mansabdorlari ma’muriy javobgarlikka tortildi. Bu haqda “Daryo”ga Davlat xizmatlari agentligi Buxoro viloyati boshqarmasi axborot xizmati rahbari Farrux To‘raqulov xabar berdi.

Ma’lum bo‘lishicha, 2021-yilning shu davriga qadar davlat xizmatlarini ko‘rsatuvchi tashkilot mas’ullari tomonidan jami 9090 ta qonunbuzish holati sodir etilgan. Shundan 3298 ta holatda davlat xizmatlarini ko‘rsatish muddatlari buzilgan bo‘lsa, 277 ta holatda fuqarolardan ortiqcha hujjatlar talab qilingan. 766 marotaba qonunga xilof ravishda to‘g‘ridan to‘g‘ri davlat xizmatlari ko‘rsatilib, 147 ta murojaat asossiz rad etilgan, 4594 ta holatda esa boshqa turdagi qonunbuzilish holatlariga yo‘l qo‘yilgan.

“Aholiga tezkor va qulay davlat xizmatlari ko‘rsatilishi talab qilinayotgan bir paytda mutasaddi davlat tashkilotlari rahbarlarining qonunbuzilish holatlarini yuzaga keltirishi odamlar noroziligini oshirishigagina xizmat qiladi. Ular sirasiga banklar xizmati, sog‘liqni saqlash muassasalari, yer resurslari va davlat kadastri, qurilish va arxitektura idoralari, ‘O‘zbekenergo’, shuningdek, DSENM kabi qator vakolatli organlar kiradi. Har bir davlat tashkiloti rahbari o‘z ishiga e’tibor va mas’uliyat bilan yondashmas ekan, odamlarning ertangi kunga ishonchi qolmaydi”, — deydi Davlat xizmatlari agentligi viloyat boshqarmasi bosh mutaxassisi Sanjar Rahmatullayev.

Qayd etilishicha, 197 nafar mansabdorga nisbatan ma’muriy bayonnoma rasmiylashtirilgan va ular ma’muriy javobgarlikka tortilgan. Shuningdek, 265 ta ogohnoma va 42 ta taqdimnoma kiritilgan. 8 nafar mansabdorga esa intizomiy jazo choralari qo‘llanilgan.

Eslatib o‘tamiz, 30-oktabr kuni Vazirlar Mahkamasi prezidiumining navbatdagi majlisi bo‘lib o‘tgandi. Unda bosh vazir qabulxonalari faoliyatida mas’uliyatsizlikka yo‘l qo‘ygan rahbarlarga nisbatan intizomiy jazo choralarini qo‘llash to‘g‘risida qaror qabul qilingan. Ular orasida energetika vazirining birinchi o‘rinbosari Azim Ahmadxo‘jayev, sog‘liqni saqlash vazirining birinchi o‘rinbosari Amrillo Inoyatov, Sirdaryo viloyati hokimi o‘rinbosari Doniyor Madirimov, Farg‘ona viloyati hokimi o‘rinbosari Iqboljon Ergashev, Toshkent shahar hokimi o‘rinbosari Sharof Rahmonovlar bor.