Germaniya va Gretsiya koronavirus tarqalishiga qarshi kurash doirasida emlanmagan fuqarolar uchun karantin cheklovlarini kuchaytirishga qaror qildi, deb xabar beradi “RBK”.
Germaniya kansleri vazifasini bajaruvchi Angela Merkel Germaniya xristian-demokratik ittifoqi yig‘ilishida mamlakatda emlanmagan fuqarolar uchun “qattiq cheklovlar” joriy etilishini ma’lum qilgan. U mazkur cheklovlar nimadan iboratligiga oydinlik kiritmagan, biroq shu bilan birga, emlanmaganlar ish joyida har kuni test topshirishi mumkinligini aytgan.
Merkel kasallar sonining ortib borayotgani uni qattiq xavotirga solayotganini bildirgan. N-TV telekanalining ma’lum qilishicha, Germaniyada koronavirus bilan kasallangan bemorlarni davolovchi intensiv terapiya bo‘linmalari to‘lib bormoqda, vaksinatsiya jarayoni esa o‘zgarishsiz qolyapti. Germaniyada shu kunga qadar 4,6 million kishida koronavirus aniqlangan, so‘nggi bir sutkada ularning soni 10,8 ming kishiga oshgan. Pandemiya boshlanganidan buyon 95,8 ming kishi COVID-19 asoratlari oqibatida vafot etgan (o‘tgan bir sutkada 81 kishi).
Gretsiya ham emlanmagan fuqarolarga nisbatan qo‘shimcha cheklovlarni joriy etishga qaror qildi. 6-noyabrdan boshlab ular banklar, ko‘ngilochar muassasalar, sartaroshxonalar, ijtimoiy tashkilotlarga PZR-test natijasini taqdim etgan holda tashrif buyura oladi. Oziq-ovqat do‘konlari, dorixonalar va diniy obyektlarga esa oldingidek bemalol kirib-chiqish mumkin.
Bundan tashqari, xususiy va davlat sektorlarining emlanmagan barcha fuqarolariga haftasiga ikki marta o‘z hisobidan koronavirusga test topshirish majburiy etib belgilanadi.
Gretsiya sog‘liqni saqlash vaziri Tanos Plevrisning ma’lum qilishicha, koronavirusga qarshi nazoratni kuchaytirish doirasida, shuningdek, bu kabi cheklov qonunlarini buzganlik uchun jarimalar oshiriladi.
Avvalroq dunyoda koronavirus qurbonlarining soni 5 milliondan oshgani, Xitoy AQSh razvedkasining COVID-19 kelib chiqishi haqidagi xulosalarini yolg‘on va ilmiy jihatdan asossiz deb aytgani to‘g‘risida xabar berilgandi.
Izoh (0)