“Effect.uz” sobiq muxbiri 3 yilga ozodlikdan mahrum qilindi

Qashqadaryoda “Effect.uz” nashrining xodimlari ustidan o‘tkazilgan sud ishi yakunlandi. Bu haqda Oliy sud matbuot xizmati xabar qildi.

Ma’lum qilinishicha, 3-noyabr kuni, Qashqadaryo viloyat sudida sudlanuvchilar Elyor Tojiboyev (1990-yilda Farg‘ona viloyatida tug‘ilgan, “Effect.uz” internet-nashri muxbiri bo‘lib ishlagan, hozirda “Taftish.uz” internet-nashri muxbiri bo‘lib ishlaydi) Akbar Nurimbetov (1982-yilda Navoiy viloyatida tug‘ilgan, “Effect.uz” internet-nashri muxbiri bo‘lib ishlaydi), Xamid Ahmedov (1987-yilda Farg‘ona viloyatida tug‘ilgan, “Effect.uz” internet-nashri muxbiri bo‘lib ishlaydi) va G.Xudoyarova (1977-yilda Surxondaryo viloyatida tug‘ilgan, yakka tartibdagi tadbirkor)ga nisbatan jinoyat ishini ko‘rib chiqish bo‘yicha ochiq sud jarayoni nihoyasiga yetdi va sud hukmi e’lon qilindi.

Ushbu jinoyat ishi Qashqadaryo viloyat sudining jinoyat ishlari bo‘yicha sudyasi N.Abdullayev raisligida ko‘rib chiqildi. E’lon qilingan sud hukmiga ko‘ra:

Elyor Tojiboyev Jinoyat kodeksining 139-moddasi 3-qismi “a”, “g” bandlari (nashr qilish yoki boshqacha usulda ko‘paytirilgan matnda yoxud ommaviy axborot vositalari orqali; og‘ir yoki o‘ta og‘ir jinoyat sodir etishda ayblab; g‘arazgo‘ylik yoki boshqa past niyatlarda qilingan tuhmat), 140-moddasi 3-qismi “a” bandi (jabrlanuvchini o‘z xizmat yoki fuqarolik burchini bajarishi munosabati bilan bog‘liq holda haqorat qilish) va 219-moddasi 1-qismida (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) nazarda tutilgan jinoyatlarni sodir etganlikda aybsiz deb e’tirof etilib, Jinoyat-protsessual kodeksining 83-moddasi (reabilitatsiya uchun asoslar) 2-bandiga asosan oqlandi. Elyor Tojiboyev Jinoyat kodeksining 219-moddasi 2-qismi va 236-moddasi (tergov qilishga yoki sud ishlarini hal etishga aralashish) 1-qismida nazarda tutilgan jinoyatlarni sodir etganlikda aybli deb topilib, unga Jinoyat kodeksining 59-moddasi (bir necha jinoyat sodir etganlik uchun jazo tayinlash)ga asosan 3 yil ozodlikdan mahrum qilish jazosi tayinlandi. Tayinlangan jazoni manzil-koloniyalarda o‘tash belgilandi.

Akbar Nurimbetov Jinoyat kodeksining 139-moddasi 3-qismi “a”, “g” bandlari, 140-moddasi 3-qismi “a” bandi va 219-moddasi 1-qismida nazarda tutilgan jinoyatlarni sodir etganlikda aybsiz deb e’tirof etilib, Jinoyat-protsessual kodeksining 83-moddasi 2-bandiga asosan oqlandi. Akbar Nurimbetov Jinoyat kodeksining 219-moddasi 2-qismi va 236-moddasi 1-qismida nazarda tutilgan jinoyatlarni sodir etganlikda aybli deb topilib, unga Jinoyat kodeksining 59-moddasiga asosan 3 yil ozodlikni cheklash jazosi tayinlandi.

Xamid Ahmedov Jinoyat kodeksining 219-moddasi 1-qismida nazarda tutilgan jinoyatni sodir etganlikda aybsiz deb e’tirof etilib, Jinoyat-protsessual kodeksining 83-moddasi 2-bandiga asosan oqlandi. Xamid Ahmedov Jinoyat kodeksining 219-moddasi 2-qismi va 236-moddasi 1-qismida nazarda tutilgan jinoyatlarni sodir etganlikda aybli deb topilib, unga Jinoyat kodeksining 59-moddasiga asosan 2 yil 6 oy ozodlikni cheklash jazosi tayinlandi.

G.Xudoyarova Jinoyat kodeksining 140-moddasi 3-qismi “a” bandida nazarda tutilgan jinoyatni sodir etganlikda aybsiz deb e’tirof etilib, Jinoyat-protsessual kodeksining 83-moddasi 2-bandiga asosan oqlandi. G.Xudoyarova Jinoyat kodeksining 139-moddasi 3-qismi “a”, “g” bandlarida nazarda tutilgan jinoyatni sodir etganlikda aybli deb topilib, unga 2 yil ozodlikni cheklash jazosi tayinlandi.

Eslatib o‘tamiz, 6-aprel kuni “Effect.uz” axborot agentligining 2 nafar muxbiriga nisbatan Jinoyat kodeksining 219- va 236-moddalari bilan sirtdan ayb e’lon qilinib, sudning ajrimi bilan qamoqqa olish ehtiyot chorasi qo‘llanilgan va ularga nisbatan qidiruv e’lon qilingandi.

Bunga 2021-yilning yanvar oyida “Effect.uz” nashrining xodimlari jinoyat ishlari bo‘yicha Termiz tuman sudi raisi xizmat xonasiga bostirib kirib, sud majlisida ishtirok etish va jarayonni tasvirga olishni talab qilgani tasvirlangan videoyozuv tarqalgani sabab bo‘lgan.