2-noyabr kuni Samarqand aeroporti tomonlarda “snos”ga tushgan hududda olib borilayotgan qazish ishlari paytida tuproq ostidan qadimiy qabr toshlari topilgani haqida xabarlar tarqaldi. Madaniy meros agentligi joyiga chiqib, vaziyatni o‘rgangan Samarqand viloyati madaniy meros boshqarmasi mutaxassislarining shu masala yuzasidan dastlabki xulosalarini e’lon qildi.
Xabarga ko‘ra, Samarqand xalqaro aeroporti MChJ xodimlari ma’lumoti asosida aeroport hududini rekonstruksiya qilish jarayonida oldingi dala hovlilar o‘rnida aniqlangan qabr toshlar Samarqand arxeologiya instituti va SamDU Tarix fakulteti xodimlari tomonidan borib o‘rganildi.
O‘rganish jarayonida o‘lchami 154x50x34 santimetrli sandiq shaklidagi qabrtosh oq marmardan ishlangani, toshning usti va yon tomonlarida “Baqara” surasining 254-, 256-oyatlari tushirilgani ma’lum bo‘ldi. Qabrtoshning ayrim qismlari yaxshi saqlamaganligi shaxsning dafn etilgan vaqti va to‘liq ism-sharifi haqida ma’lumot olish jarayonini murakkablashtirmoqda. Dastlabki ko‘zdan kechirish natijasida unda “Oqila bibi” degan yozuv yozilganligi aniqlandi.
Ikkinchi qabrtosh ham sandiq shaklida bo‘lib, qora marmar toshdan ishlangan, unda hijriy 1049 (1659)-yil sanasi bitilgan, o‘lchami 116x37x25 santimetr. Qabrtosh sohibining ismi yozilgan tomoniga shikast yetganligi sababli hozircha bu borada ma’lumot mavjud emas. Ayni vaqtda tadqiqot ishlari davom etmoqda.
“Qabrtoshlar Samarqand xalqaro aeroporti tomonidan Samarqand o‘lkashunoslik muzeyiga olib kelindi, tadqiqot ishlari davom etmoqda. Madaniy meros agentligi tomonidan o‘rganishlar yakuni bo‘yicha batafsil ma’lumot berilishini ma’lum qilamiz”, — deyiladi agentlik xabarida.
Izoh (0)