Samarqandda 1700 dona “Tramadol Lannaxer 50” psixotrop dori vositalarini 2 ming dollarga sotmoqchi bo‘lgan shaxs qo‘lga olindi. Bu haqda DXX Samarqand viloyati boshqarmasi “Daryo”ga ma’lum qildi.
Ma’lum qilinishicha, 2-noyabr kuni Davlat xavfsizlik xizmati Samarqand viloyati boshqarmasi, Bojxona boshqarmasi va IIB xodimlari hamkorligida Toyloq tumani hududida tezkor tadbir o‘tkazilgan. Tadbir davomida Namangan shahrida yashovchi, 1977-yilda tug‘ilgan E.Sh. va G.X. ismli fuqarolar bo‘lgan Toyloq—Urgut yo‘nalishi bo‘yicha harakatlanib ketayotgan Cobalt rusumli avtomashina yukxonasi tekshirilgan. Tekshiruv davomida yukxonadagi oyoq kiyim qutilari ichida 1700 dona (170 konvalyuta) “Tramadol Lannaxer 50” psixotrop dori vositalari yashirilgani aniqlanib, xolislar ishtirokida rasmiylashtirilib olingan.
Ta’kidlanishicha, ushbu shaxslar psixotrop dori vositalarini Namangan shahrida 8,5 million so‘mga sotib olib, Urgut tumanida yashovchi fuqaroga 2 ming AQSh dollariga sotmoqchi bo‘lgan.
Ushlangan shaxslarga nisbatan Jinoyat kodeksining 246-(kontrabanda) va 273-moddalari (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) bilan jinoyat ishi qo‘zg‘atilgan.
Avvalroq O‘zbekistonga qariyb 156 kilo giyohvandlik vositalarini olib kirishga uringan yuk mashinasi aniqlangani, DXX xodimlari qator viloyatlarda opiy va gashish savdosi bilan shug‘ullanuvchi narkokuryerlarni qo‘lga olgani, Toshkent viloyatida xonadonidagi gultuvaklarda giyohvandlik vositasi yetishtirib kelgan fuqaro ushlangani to‘g‘risida xabar berilgandi.
Izoh (0)