«Effect.uz» собиқ мухбири 3 йилга озодликдан маҳрум қилинди

Қашқадарёда «Effect.uz» нашрининг ходимлари устидан ўтказилган суд иши якунланди. Бу ҳақда Олий суд матбуот хизмати хабар қилди.

Маълум қилинишича, 3 ноябрь куни, Қашқадарё вилоят судида судланувчилар Элёр Тожибоев (1990 йилда Фарғона вилоятида туғилган, «Effect.uz» интернет-нашри мухбири бўлиб ишлаган, ҳозирда «Taftish.uz» интернет-нашри мухбири бўлиб ишлайди) Акбар Нуримбетов (1982 йилда Навоий вилоятида туғилган, «Effect.uz» интернет-нашри мухбири бўлиб ишлайди), Хамид Аҳмедов (1987 йилда Фарғона вилоятида туғилган, «Effect.uz» интернет-нашри мухбири бўлиб ишлайди) ва Г.Худоярова (1977 йилда Сурхондарё вилоятида туғилган, якка тартибдаги тадбиркор)га нисбатан жиноят ишини кўриб чиқиш бўйича очиқ суд жараёни ниҳоясига етди ва суд ҳукми эълон қилинди.

Ушбу жиноят иши Қашқадарё вилоят судининг жиноят ишлари бўйича судьяси Н.Абдуллаев раислигида кўриб чиқилди. Эълон қилинган суд ҳукмига кўра:

Элёр Тожибоев Жиноят кодексининг 139-моддаси 3-қисми «а», «г» бандлари (нашр қилиш ёки бошқача усулда кўпайтирилган матнда ёхуд оммавий ахборот воситалари орқали; оғир ёки ўта оғир жиноят содир этишда айблаб; ғаразгўйлик ёки бошқа паст ниятларда қилинган туҳмат), 140-моддаси 3-қисми «а» банди (жабрланувчини ўз хизмат ёки фуқаролик бурчини бажариши муносабати билан боғлиқ ҳолда ҳақорат қилиш) ва 219-моддаси 1-қисмида (ҳокимият вакилига ёки фуқаровий бурчини бажараётган шахсга қаршилик кўрсатиш) назарда тутилган жиноятларни содир этганликда айбсиз деб эътироф этилиб, Жиноят-процессуал кодексининг 83-моддаси (реабилитация учун асослар) 2-бандига асосан оқланди. Элёр Тожибоев Жиноят кодексининг 219-моддаси 2-қисми ва 236-моддаси (тергов қилишга ёки суд ишларини ҳал этишга аралашиш) 1-қисмида назарда тутилган жиноятларни содир этганликда айбли деб топилиб, унга Жиноят кодексининг 59-моддаси (бир неча жиноят содир этганлик учун жазо тайинлаш)га асосан 3 йил озодликдан маҳрум қилиш жазоси тайинланди. Тайинланган жазони манзил-колонияларда ўташ белгиланди.

Акбар Нуримбетов Жиноят кодексининг 139-моддаси 3-қисми «а», «г» бандлари, 140-моддаси 3-қисми «а» банди ва 219-моддаси 1-қисмида назарда тутилган жиноятларни содир этганликда айбсиз деб эътироф этилиб, Жиноят-процессуал кодексининг 83-моддаси 2-бандига асосан оқланди. Акбар Нуримбетов Жиноят кодексининг 219-моддаси 2-қисми ва 236-моддаси 1-қисмида назарда тутилган жиноятларни содир этганликда айбли деб топилиб, унга Жиноят кодексининг 59-моддасига асосан 3 йил озодликни чеклаш жазоси тайинланди.

Хамид Аҳмедов Жиноят кодексининг 219-моддаси 1-қисмида назарда тутилган жиноятни содир этганликда айбсиз деб эътироф этилиб, Жиноят-процессуал кодексининг 83-моддаси 2-бандига асосан оқланди. Хамид Аҳмедов Жиноят кодексининг 219-моддаси 2-қисми ва 236-моддаси 1-қисмида назарда тутилган жиноятларни содир этганликда айбли деб топилиб, унга Жиноят кодексининг 59-моддасига асосан 2 йил 6 ой озодликни чеклаш жазоси тайинланди.

Г.Худоярова Жиноят кодексининг 140-моддаси 3-қисми «а» бандида назарда тутилган жиноятни содир этганликда айбсиз деб эътироф этилиб, Жиноят-процессуал кодексининг 83-моддаси 2-бандига асосан оқланди. Г.Худоярова Жиноят кодексининг 139-моддаси 3-қисми «а», «г» бандларида назарда тутилган жиноятни содир этганликда айбли деб топилиб, унга 2 йил озодликни чеклаш жазоси тайинланди.

Эслатиб ўтамиз, 6 апрель куни «Effect.uz» ахборот агентлигининг 2 нафар мухбирига нисбатан Жиноят кодексининг 219- ва 236-моддалари билан сиртдан айб эълон қилиниб, суднинг ажрими билан қамоққа олиш эҳтиёт чораси қўлланилган ва уларга нисбатан қидирув эълон қилинганди.

Бунга 2021 йилнинг январь ойида «Effect.uz» нашрининг ходимлари жиноят ишлари бўйича Термиз туман суди раиси хизмат хонасига бостириб кириб, суд мажлисида иштирок этиш ва жараённи тасвирга олишни талаб қилгани тасвирланган видеоёзув тарқалгани сабаб бўлган.