«Ўзбекнефтгаз» бошқаруви раисининг ўринбосари Мухтор Темиров Президент сайловини ёритмоқчи бўлган журналистлар учун ажратилган автобусни «олиб қўйгани», шунингдек, «Дарё» мухбирини бўғиб, камерасини тортиб олмоқчи бўлгани тўғрисида хабар берилганди. Компания матбуот хизмати мазкур ҳолат юзасидан расмий баёнот бериб, содир бўлган воқеа Одоб-ахлоқ комиссияси томонидан ўрганилаётганини маълум қилди.
Таъкидланишича, мақолада келтирилган барча ҳолатлар, жамиятнинг бир неча нафар масъул ходимларининг ҳаракатларига нисбатан «Ўзбекнефтгаз» АЖ бошқаруви раиси Меҳриддин Абдуллаев бошчилигида тузилган Одоб-ахлоқ комиссияси томонидан ўрганилмоқда.
Бошқарув раиси «Ўзбекнефтгаз» АЖ тарихида илк марта халқаро Fitch Ratings ва S&P Global Ratings каби нуфузли компаниялар томонидан ББ даражасидаги халқаро кредит рейтинги берилгани, трансформация ва рақамлаштириш соҳасида мақтовга арзигулик натижаларга эришилган бир даврда бу ҳолатни содир бўлганини ўта оғриқли қабул қилганини билдирган, шунингдек, бу ҳолат жамиятнинг ОАВдаги имижига кескин салбий таъсир кўрсатганини таъкидлаган.
Бошқарув раиси буйруғи билан жамият тизимидаги барча масъул раҳбарларнинг ОАВ ходимлари, журналистлар ҳамда блогерлар билан мулоқот давомида аввало ҳиссиётлар ва таассуротларга берилмасдан очиқлик, ошкоралик тамойилларига амал қилган ҳолда, ҳар қандай вазиятда ҳам хушмуомалалик билан муносабатда бўлиш белгилаб қўйилган.
Бундан ташқари, бошқарув раиси «Ўзбекнефтгаз» АЖда фаолият юритаётган барча масъул раҳбарлар ва ходимлар Ўзбекистоннинг «Журналистлик фаолиятини ҳимоя қилиш тўғрисида»ги қонунига қатъий амал қилган ҳолда журналистнинг ҳуқуқлари, шаъни ва қадр-қимматини ҳурмат қилишга мажбур эканини ва ҳар қандай ҳолатда журналистнинг журналистлик фаолиятига аралашишни кескин қоралашини, бунинг учун лавозимидан қатъий назар барчага нисбатан чора кўрилишини маълум қилган.
Қайд этилишича, журналистлар билан бўлган бу ҳолат Одоб-ахлоқ комиссияси томонидан батафсил ўрганиб чиқилади ва олиб борилган ўрганиш натижалари бўйича қўшимча ахборот тақдим этилади.
«‘Ўзбекнефтгаз’ АЖ халқаро ва маҳаллий ОАВ вакиллари, блогерлар, жамоатчилик фаоллари билан ўзаро ҳурматга асосланган икки томонлама ҳамкорлик, очиқ ва шаффоф мулоқот қилишга доимо тайёр эканлигини билдирамиз. Шунингдек, мамлакатимизда сўз ва матбуот эркинлигини таъминлаш, журналистларни қўллаб-қувватлаш бўйича олиб борилаётган давлат сиёсатини сўзсиз тўла қўллаб-қувватлаймиз», — дейилади муносабатда.
Изоҳ (0)