O‘zbekiston Bosh prokuraturasi jamoatchilik bilan aloqalar va huquqiy axborot bo‘limi prokurori lavozimida ishlab kelgan Samir Rahmonov 26-aprel kuni 33 yoshida vafot etgandi. Oliy Majlis Qonunchilik palatasi deputati Rasul Kusherbayevning yozishicha, marhumning otasi deputatga murojaat qilib, o‘g‘li xizmat vazifasini bajarayotgan vaqtda ish joyida vafot etgani, to‘rt nafar voyaga yetmagan farzandlari boquvchisiz qolsa-da, uning oilasiga qonunga asosan kafolatlangan nafaqa pullari to‘lab berilmayotganini bildirgan.
Deputatning qayd etishicha, murojaatga tikilgan tibbiyot xodimlarining 26-apreldagi 10-sonli dalolatnomasida soat 10:35 da tibbiyot bo‘limiga prokuratura xodimlari tomonidan Samir Rahmonovning jasadi olib kelingani bildirilgan. Bu marhumning ish vaqtida ish joyida vafot etganidan dalolat beradi.
Mehnat kodeksining 192- va 194-moddasida xodim mehnat vazifalarini bajarish sababli vafot etsa, zararni to‘lashi shartligi, xodimning vafoti munosabati bilan ish beruvchi tomonidan biryo‘la beriladigan nafaqaning miqdori, marhumning olti yillik o‘rtacha ish haqidan kam bo‘lishi mumkinmasligi belgilangan.
Shuningdek, “Prokuratura to‘g‘risida”gi qonunning 51-moddasida prokuratura organlari xodimlarining hayoti va sog‘lig‘i davlat himoyasida bo‘lishi hamda respublika budjeti mablag‘lari hisobidan davlat tomonidan majburiy tartibda sug‘urtalanishi va sug‘urta organlari prokuratura xodimi ishlayotgan davrida vafot etsa, uning merosxo‘rlariga Mehnat kodeksining 194-moddasi 2-qismida nazarda tutilgan tartibda sug‘urta summasini to‘lashi ko‘rsatib o‘tilgan.
“Biroq Bosh prokuratura tomonidan marhum xodimning oila a’zolariga qonunda belgilangan nafaqa pullari berilmagan. Oxiri marhumning otasi adolat izlab sudga arz qilgan. Fuqarolik ishlari bo‘yicha Mirobod tumanlararo sudi esa da’vo arizani qanoatlantirishdan rad etgan.
Sudlarimizning hozirgi ahvolida Bosh prokuraturaga qarshi da’voni qanoatlantirish ehtimoli past bo‘lsa-da, marhumning otasi qonun ijrosi ta’minlanishi umidida qaror ustidan Toshkent shahar sudiga apellyatsiya shikoyati keltiribdi. Axir adolat qaror topishi kerak-ku”, — deb yozmoqda Rasul Kusherbayev.
Holat yuzasidan Toshkent shahar sudi matbuot xizmati rasmiy bayonot berdi.
Unda aytilishicha, marhum Samir Rahmonovning otasi A.Rahmonov Fuqarolik ishlari bo‘yicha Mirobod tumanlararo sudiga javobgar Bosh prokuraturasiga nisbatan farzandi vafoti munosabati bilan ish joyidan nafaqa puli undirish haqidagi da’vo arizasi hamda ma’naviy zararni undirish to‘g‘risidagi qo‘shimcha da’vosi bilan 3-avgust kuni murojaat etgan.
Fuqarolik ishi sud majlisida ko‘rib chiqilishi 24-avgust kuniga tayinlangan. Shu kungi sud majlisida taraflar va ularning vakillari ishtirok etib, o‘z vajlarini keltirib, da’vogar tomonidan ma’naviy zarar undirish to‘g‘risida qo‘shimcha da’vo talabi kelib tushgan. Mazkur qo‘shimcha da’vo yuzasidan fuqarolik ishi doirasida Bosh prokuratura tomonidan hujjatlar taqdim etilishi, Moliya vazirligi huzuridagi budjetdan tashqari Pensiya jamg‘armasi hamda mehnat huquq inspektorini uchinchi shaxs sifatida jalb etilishi sababli sud majlisi 6-sentabrga qoldirilgan.
Shu kungi sud majlisida mutaxassis sifatida jalb etilgan budjetdan tashqari Pensiya jamg‘armasi Yashnobod tuman bo‘limi vakili va mehnat huquq inspektori kelmagani sababli sud majlisi 17-sentabrga qoldirilgan. Sudning 17-sentabrdagi hal qiluv qarori bilan A.Rahmonovning da’vosi va qo‘shimcha da’vo arizasi rad qilingan. Da’vogar mazkur hal qiluv qaroridan norozi bo‘lib, sudga apellyatsiya shikoyati kiritgan.
Bayonotda ma’lum qilinishicha, ushbu shikoyat Toshkent shahar sudi fuqarolik ishlari bo‘yicha sudlov hay’atida ko‘rib chiqiladi.
Izoh (0)