Ўзбекистон Бош прокуратураси жамоатчилик билан алоқалар ва ҳуқуқий ахборот бўлими прокурори лавозимида ишлаб келган Самир Раҳмонов 26 апрель куни 33 ёшида вафот этганди. Олий Мажлис Қонунчилик палатаси депутати Расул Кушербаевнинг ёзишича, марҳумнинг отаси депутатга мурожаат қилиб, ўғли хизмат вазифасини бажараётган вақтда иш жойида вафот этгани, тўрт нафар вояга етмаган фарзандлари боқувчисиз қолса-да, унинг оиласига қонунга асосан кафолатланган нафақа пуллари тўлаб берилмаётганини билдирган.
Депутатнинг қайд этишича, мурожаатга тикилган тиббиёт ходимларининг 26 апрелдаги 10-сонли далолатномасида соат 10:35 да тиббиёт бўлимига прокуратура ходимлари томонидан Самир Раҳмоновнинг жасади олиб келингани билдирилган. Бу марҳумнинг иш вақтида иш жойида вафот этганидан далолат беради.
Меҳнат кодексининг 192- ва 194-моддасида ходим меҳнат вазифаларини бажариш сабабли вафот этса, зарарни тўлаши шартлиги, ходимнинг вафоти муносабати билан иш берувчи томонидан бирйўла бериладиган нафақанинг миқдори, марҳумнинг олти йиллик ўртача иш ҳақидан кам бўлиши мумкинмаслиги белгиланган.
Шунингдек, «Прокуратура тўғрисида»ги қонуннинг 51-моддасида прокуратура органлари ходимларининг ҳаёти ва соғлиғи давлат ҳимоясида бўлиши ҳамда республика бюджети маблағлари ҳисобидан давлат томонидан мажбурий тартибда суғурталаниши ва суғурта органлари прокуратура ходими ишлаётган даврида вафот этса, унинг меросхўрларига Меҳнат кодексининг 194-моддаси 2-қисмида назарда тутилган тартибда суғурта суммасини тўлаши кўрсатиб ўтилган.
«Бироқ Бош прокуратура томонидан марҳум ходимнинг оила аъзоларига қонунда белгиланган нафақа пуллари берилмаган. Охири марҳумнинг отаси адолат излаб судга арз қилган. Фуқаролик ишлари бўйича Миробод туманлараро суди эса даъво аризани қаноатлантиришдан рад этган.
Судларимизнинг ҳозирги аҳволида Бош прокуратурага қарши даъвони қаноатлантириш эҳтимоли паст бўлса-да, марҳумнинг отаси қонун ижроси таъминланиши умидида қарор устидан Тошкент шаҳар судига апелляция шикояти келтирибди. Ахир адолат қарор топиши керак-ку», — деб ёзмоқда Расул Кушербаев.
Ҳолат юзасидан Тошкент шаҳар суди матбуот хизмати расмий баёнот берди.
Унда айтилишича, марҳум Самир Раҳмоновнинг отаси А.Раҳмонов Фуқаролик ишлари бўйича Миробод туманлараро судига жавобгар Бош прокуратурасига нисбатан фарзанди вафоти муносабати билан иш жойидан нафақа пули ундириш ҳақидаги даъво аризаси ҳамда маънавий зарарни ундириш тўғрисидаги қўшимча даъвоси билан 3 август куни мурожаат этган.
Фуқаролик иши суд мажлисида кўриб чиқилиши 24 август кунига тайинланган. Шу кунги суд мажлисида тарафлар ва уларнинг вакиллари иштирок этиб, ўз важларини келтириб, даъвогар томонидан маънавий зарар ундириш тўғрисида қўшимча даъво талаби келиб тушган. Мазкур қўшимча даъво юзасидан фуқаролик иши доирасида Бош прокуратура томонидан ҳужжатлар тақдим этилиши, Молия вазирлиги ҳузуридаги бюджетдан ташқари Пенсия жамғармаси ҳамда меҳнат ҳуқуқ инспекторини учинчи шахс сифатида жалб этилиши сабабли суд мажлиси 6 сентябрга қолдирилган.
Шу кунги суд мажлисида мутахассис сифатида жалб этилган бюджетдан ташқари Пенсия жамғармаси Яшнобод туман бўлими вакили ва меҳнат ҳуқуқ инспектори келмагани сабабли суд мажлиси 17 сентябрга қолдирилган. Суднинг 17 сентябрдаги ҳал қилув қарори билан А.Раҳмоновнинг даъвоси ва қўшимча даъво аризаси рад қилинган. Даъвогар мазкур ҳал қилув қароридан норози бўлиб, судга апелляция шикояти киритган.
Баёнотда маълум қилинишича, ушбу шикоят Тошкент шаҳар суди фуқаролик ишлари бўйича судлов ҳайъатида кўриб чиқилади.
Изоҳ (0)