Germaniya politsiyasi oktabr oyida Belarus va Polsha orqali mamlakat chegarasini noqonuniy kesib o‘tishga uringan 5285 kishini qo‘lga olgan, deb xabar beradi “Korrespondent.net”.
Ma’lum qilinishicha, 2021-yil boshidan buyon huquq-tartibot xodimlari Germaniyaga shu orqali o‘tishga uringan 7832 kishini to‘xtatib qolgan.
So‘nggi ikki kun ichida politsiya Polshadan respublika hududiga o‘tmoqchi bo‘lgan 597 nafar noqonuniy migrant ushlagan — ular Iroq, Suriya, Eron va Afg‘oniston fuqarolaridir. 18 nafar kontrabandachiga nisbatan tergov ishlari boshlangan. Polshadan Germaniyaga noqonuniy muhojirlarning ortib ketishi avgust oyidan buyon kuzatilmoqda.
Avvalroq Belarus va Polsha chegarasida 24-oktabr kuni kechqurun 60 ga yaqin noqonuniy muhojirlar guruhi Polshaga bostirib kirmoqchi bo‘lgani, tartibsizliklarda ikki polshalik askar yaralangani to‘g‘risida xabar berilgandi. Polsha ofitserlari chegaradan o‘tganlar orasida simto‘siqni kesgan fuqarolik kiyimidagi belaruslik askarlarni tanib qolgan.
Belarus va Yevropa Ittifoqi mamlakatlari chegarasidagi migratsion inqiroz Aleksandr Lukashenkoning Minsk endi Yevropani muhojirlardan himoya qilmoqchi emasligini aytganidan keyin boshlandi. Shundan so‘ng, ommaviy axborot vositalarida xabar berilishicha, belaruslik chegarachilar chegarani noqonuniy kesib o‘tmoqchi bo‘lgan odamlarga jiddiy to‘sqinlik qilmaslik haqida yashirin ko‘rsatma olgan.
Izoh (0)