JCh bilan xayrlashayotgan o‘zbek bokschilari, 400 lik dovondan o‘tgan Ibrahimovich va Angliyaga qaytayotgan Konte. Eng so‘nggi sport yangiliklari

Dunyo va o‘zbek sportiga oid 1-noyabr kunining eng muhim xabarlari dayjesti bilan tanishing.

O‘zbekiston

Dzyudo bo‘yicha O‘zbekiston terma jamoasi Fransiyaning Parij shahrida harbiylar o‘rtasidagi jahon chempionatida muvaffaqiyatli ishtirok etmoqda.

Unda Ulug‘bek Azizov va Tohir Fayziyev murabbiyligidagi dzyudochilar yakkalik bahslari yakuniga ko‘ra 4 ta oltin, 1 ta bronza medali bilan umumjamoa hisobida birinchi o‘rinni egalladi. Diyora Keldiyorova (-52 kg), Dilshodjon Baratov (-60 kg), Davlat Bobonov (-90 kg) va Muzaffarbek To‘raboyev (-100 kg) jahon chempioniga aylangan bo‘lsa, Shohrux Baxtiyorov (+100 kg) bronza medaliga sazovor bo‘ldi.

Ikkinchi o‘rinni braziliyalik dzyudochilar (3 ta oltin, 4 ta kumush, 4 ta bronza) egallagan bo‘lsa, kuchli uchlikka mezbon Fransiya terma jamoasi (3 ta oltin, 3 ta kumush, 4 ta bronza) yakun yasadi.

Endilikda o‘zbekistonlik sportchilar musobaqaning jamoaviy yo‘nalishda o‘z imkoniyatini sinab ko‘radi.

O‘zbekiston 2022-yilgi qishki Olimpiya o‘yinlariga ilk yo‘llanmasini qo‘lga kiritdi

Tog‘ chang‘isi bo‘yicha O‘zbekiston terma jamoasi a’zosi Komiljon To‘xtayev 2022-yilda Xitoyning Pekin shahrida bo‘lib o‘tadigan XXIV qishki Olimpiya o‘yinlariga yo‘llanmani qo‘lga kiritdi. Bu haqda Turizm va sport vazirligi O‘zbekiston chang‘i federatsiyasiga tayanib xabar bermoqda.

Komiljon To‘xtayev tog‘ chang‘isining slalom va gigant slalom yo‘nalishlarida o‘tkazilgan saralash bahslarida jamg‘arilgan ochkolariga ko‘ra qishki Olimpiya o‘yinlari normativini bajargan va 2022-yili Pekin mezbonligida o‘tadigan musobaqaga yo‘llanmani qo‘lga kiritgan.

Qayd etish kerak, Xalqaro Olimpiya Qo‘mitasi qoidalariga ko‘ra, O‘zbekiston tog‘ chang‘i sporti bo‘yicha atigi 2 ta yo‘llanmaga (bir nafardan erkak va ayol) da’vogarlik qilishi mumkin.

Jahon chempionatini tark etgan o‘zbekistonlik bokschilar soni 6 nafarga yetdi

Serbiyaning Belgrad shahrida boks bo‘yicha Jahon chempionatining 1-noyabr kungi bahslari o‘tkazilmoqda.

Asadxo‘ja Mo‘ydinxo‘jayev 1/8 finalda yaponiyalik Sevonres Okazavaga qarshi to‘qnash keldi va mag‘lubiyatga uchradi. Yaponiyalik bokschi uchala raundda ham Asadxo‘ja ustidan ustunlikka erishdi. Shu tariqa JChni tark etgan o‘zbekistonlik bokschilar soni 6 nafarga yetdi. Bungacha Hasanboy Do‘stmatov, Shohjahon Abdullayev, Mirazizbek Mirzaxalilov, Shahram G‘iyosov va Shahobiddin Zoirov Jahon chempionati bilan xayrlashgandi.

Saidjamshid Ja’farov esa ozarbayjonlik Mirsharif Kazimzadeni 5:0 hisobida yengib, chorak final yo‘llanmasini qo‘lga kiritdi.

Shuningdek, 1-noyabr kuni Mujibillo Tursunov (23:10 dan keyin) va Odiljon Aslonov (00:30 dan so‘ng) ham o‘z janglarini o‘tkazdi.

Jahon

Nunu Eshpiritu Santu “Tottenhem” bosh murabbiyi lavozimidan ozod etildi. London klubini 47 yoshli portugaliyalik mutaxassis bilan birgalikda butun murabbiylar shtabi ham tark etgan.

“Shporlar” Angliya Premyer Ligasining 10-turidan keyin 15 ochko to‘plagan holda 8-o‘rinni egallab turibdi. Jamoa APL doirasida 7 o‘yinning 5 tasida mag‘lubiyatga uchradi.

Nunu 2021-yilning iyun oyida “Vulverhempton”dan ketib, “Tottenhem”ni qabul qilib olgandi.

Jurnalist Janluka di Martsioga ko‘ra, Nununing o‘rnini Antonio Konte egallaydi. Tomonlar 1,5 yillik shartnoma borasida kelishuv borasida muzokaralar o‘tkazmoqda.

Nikola Skira esa Kontening “Tottenhem”dan uch yillik shartnoma va 3—4 ta muhim transfer talab qilayotgani haqida xabar berdi. Qayd etilishicha, Konte Londonga yetib kelgan va va tez orada “Tottenhem” sport direktori Fabio Paratichi bilan uchrashadi.

“PSJ” Ramos bilan shartnomani bekor qilishi mumkin

“PSJ” hujumchisi Serxio Ramos “PSJ”ni tark etishi mumkin.

Get French Football News’ga ko‘ra, klub 35 yoshli ispaniyalik himoyachi bilan shartnomani bekor qilish variantini ko‘rib chiqishi mumkin.

Parijliklar futbolchining sog‘lig‘i va jismoniy holatidan xavotirda. U o‘tgan yozda “Real”dan erkin agent maqomida kelganidan beri hali jamoada debyut qilgani yo‘q.

Serxioda mushak jarohatidan tiklanish jarayoni qiyin o‘tmoqda. Shoshilinchda qilingan muolajalar esa yangi muammolarni keltirib chiqargan. Futbolchi individual mashqlarda hamon og‘riq his qilayotgani aytilmoqda.

Parijliklar sport direktori Leonardo esa matbuot bu mavzuni ortiqcha bo‘rttirib yuborayotgani va klub Ramosning holatidan avvaldan xabardor bo‘lganini aytgan.

Joze Mourinyo faoliyatida ilk bor A Seriya doirasidagi uy o‘yinida yutqazdi, bungacha 43 o‘yindan iborat mag‘lubiyatsiz seriya bo‘lgandi

“Roma” Italiya chempionatining 11-turida o‘z maydonida “Milan”ga yutqazdi (1:2).

Rim klubi bosh murabbiyi Joze Mourino uchun bu A Seriya doirasida uy uchrashuvlaridagi ilk mag‘lubiyati bo‘ldi. Shu tariqa “Milan”dan uchralgan mag‘lubiyat Mourinyoning Italiya chempionati uy o‘yinlaridagi 43 o‘yindan iborat mag‘lubiyatsiz seriyasini to‘xtatdi.

Qayd etish kerak, ushbu ko‘rsatkich Italiya chempionatidagi 3 ochkolik davrda (1994/95-yilgi mavsumdan beri) murabbiylar uchun eng yaxshi natija hisoblanadi.

Ibrahimovich milliy chempionatlar doirasida 400-golini urdi

“Milan” hujumchisi Zlatan Ibrahimovich A Seriya 11-turidan o‘rin olgan “Roma”ga qarshi o‘yinda (2:1) gol urdi.

Shvetsiyalik futbolchi uchun bu gol o‘zi o‘ynagan barcha milliy chempionatlardagi 400-gol bo‘ldi. U Shvetsiya chempionatidagi ilk golini bundan 22 yil avval, 1999-yilning 30-oktabrida “Malmyo” safida urgandi.

A Seriyada esa bu gol 40 yoshli hujumchi uchun 150-gol bo‘ldi. U faoliyati mobaynida “Yuventus”, “Inter”, “Milan”, “Ayaks”, “Barselona”, “PSJ”, “Manchester Yunayted” va “Los-Anjeles Gelaksi” klublarida to‘p surgan.

Germaniya Kubogi nimchorak finaliga qur’a tashlandi

Germaniya Kubogining nimchorak final bosqichiga qur’a tashlandi. Unga ko‘ra, 1/8 final bosqichida “Borussiya D” “Sankt-Pauli”ga qarshi maydonga chiqadi. “Bavariya” esa mazkur bosqichga qadar yetib kelolmadi. Bellashuvlar 2022-yilning 18—19-yanvar kunlari bo‘lib o‘tadi.