Дунё ва ўзбек спортига оид 1 ноябрь кунининг энг муҳим хабарлари дайжести билан танишинг.
Ўзбекистон
Ҳарбийлар ўртасидаги ЖЧда Ўзбекистон терма жамоаси 1-ўринни эгалладиДзюдо бўйича Ўзбекистон терма жамоаси Франциянинг Париж шаҳрида ҳарбийлар ўртасидаги жаҳон чемпионатида муваффақиятли иштирок этмоқда.
Унда Улуғбек Азизов ва Тоҳир Файзиев мураббийлигидаги дзюдочилар яккалик баҳслари якунига кўра 4 та олтин, 1 та бронза медали билан умумжамоа ҳисобида биринчи ўринни эгаллади. Диёра Келдиёрова (-52 кг), Дилшоджон Баратов (-60 кг), Давлат Бобонов (-90 кг) ва Музаффарбек Тўрабоев (-100 кг) жаҳон чемпионига айланган бўлса, Шоҳрух Бахтиёров (+100 кг) бронза медалига сазовор бўлди.
Иккинчи ўринни бразилиялик дзюдочилар (3 та олтин, 4 та кумуш, 4 та бронза) эгаллаган бўлса, кучли учликка мезбон Франция терма жамоаси (3 та олтин, 3 та кумуш, 4 та бронза) якун ясади.
Эндиликда ўзбекистонлик спортчилар мусобақанинг жамоавий йўналишда ўз имкониятини синаб кўради.
Ўзбекистон 2022 йилги қишки Олимпия ўйинларига илк йўлланмасини қўлга киритди
Тоғ чанғиси бўйича Ўзбекистон терма жамоаси аъзоси Комилжон Тўхтаев 2022 йилда Хитойнинг Пекин шаҳрида бўлиб ўтадиган XXIV қишки Олимпия ўйинларига йўлланмани қўлга киритди. Бу ҳақда Туризм ва спорт вазирлиги Ўзбекистон чанғи федерациясига таяниб хабар бермоқда.
Комилжон Тўхтаев тоғ чанғисининг слалом ва гигант слалом йўналишларида ўтказилган саралаш баҳсларида жамғарилган очколарига кўра қишки Олимпия ўйинлари нормативини бажарган ва 2022 йили Пекин мезбонлигида ўтадиган мусобақага йўлланмани қўлга киритган.
Қайд этиш керак, Халқаро Олимпия Қўмитаси қоидаларига кўра, Ўзбекистон тоғ чанғи спорти бўйича атиги 2 та йўлланмага (бир нафардан эркак ва аёл) даъвогарлик қилиши мумкин.
Жаҳон чемпионатини тарк этган ўзбекистонлик боксчилар сони 6 нафарга етди
Сербиянинг Белград шаҳрида бокс бўйича Жаҳон чемпионатининг 1 ноябрь кунги баҳслари ўтказилмоқда.
Асадхўжа Мўйдинхўжаев 1/8 финалда япониялик Севонрес Оказавага қарши тўқнаш келди ва мағлубиятга учради. Япониялик боксчи учала раундда ҳам Асадхўжа устидан устунликка эришди. Шу тариқа ЖЧни тарк этган ўзбекистонлик боксчилар сони 6 нафарга етди. Бунгача Ҳасанбой Дўстматов, Шоҳжаҳон Абдуллаев, Миразизбек Мирзахалилов, Шаҳрам Ғиёсов ва Шаҳобиддин Зоиров Жаҳон чемпионати билан хайрлашганди.
Саиджамшид Жаъфаров эса озарбайжонлик Миршариф Казимзадени 5:0 ҳисобида енгиб, чорак финал йўлланмасини қўлга киритди.
Шунингдек, 1 ноябрь куни Мужибилло Турсунов (23:10 дан кейин) ва Одилжон Аслонов (00:30 дан сўнг) ҳам ўз жангларини ўтказди.
Жаҳон
«Тоттенҳэм» Нуну Эшпириту Сантуни истеъфога чиқарди, унинг ўрнини Антонио Конте эгаллаши кутилмоқда
Нуну Эшпириту Санту «Тоттенҳэм» бош мураббийи лавозимидан озод этилди. Лондон клубини 47 ёшли португалиялик мутахассис билан биргаликда бутун мураббийлар штаби ҳам тарк этган.
«Шпорлар» Англия Премьер Лигасининг 10-туридан кейин 15 очко тўплаган ҳолда 8-ўринни эгаллаб турибди. Жамоа АПЛ доирасида 7 ўйиннинг 5 тасида мағлубиятга учради.
Нуну 2021 йилнинг июнь ойида «Вулверҳэмптон»дан кетиб, «Тоттенҳэм»ни қабул қилиб олганди.
Журналист Жанлука ди Марциога кўра, Нунунинг ўрнини Антонио Конте эгаллайди. Томонлар 1,5 йиллик шартнома борасида келишув борасида музокаралар ўтказмоқда.
Никола Скира эса Контенинг «Тоттенҳэм»дан уч йиллик шартнома ва 3—4 та муҳим трансфер талаб қилаётгани ҳақида хабар берди. Қайд этилишича, Конте Лондонга етиб келган ва ва тез орада «Тоттенҳэм» спорт директори Фабио Паратичи билан учрашади.
«ПСЖ» Рамос билан шартномани бекор қилиши мумкин
«ПСЖ» ҳужумчиси Серхио Рамос «ПСЖ»ни тарк этиши мумкин.
Get French Football News’га кўра, клуб 35 ёшли испаниялик ҳимоячи билан шартномани бекор қилиш вариантини кўриб чиқиши мумкин.
Парижликлар футболчининг соғлиғи ва жисмоний ҳолатидан хавотирда. У ўтган ёзда «Реал»дан эркин агент мақомида келганидан бери ҳали жамоада дебют қилгани йўқ.
Серхиода мушак жароҳатидан тикланиш жараёни қийин ўтмоқда. Шошилинчда қилинган муолажалар эса янги муаммоларни келтириб чиқарган. Футболчи индивидуал машқларда ҳамон оғриқ ҳис қилаётгани айтилмоқда.
Парижликлар спорт директори Леонардо эса матбуот бу мавзуни ортиқча бўрттириб юбораётгани ва клуб Рамоснинг ҳолатидан аввалдан хабардор бўлганини айтган.
Жозе Моуриньо фаолиятида илк бор А Серия доирасидаги уй ўйинида ютқазди, бунгача 43 ўйиндан иборат мағлубиятсиз серия бўлганди
«Рома» Италия чемпионатининг 11-турида ўз майдонида «Милан»га ютқазди (1:2).
Рим клуби бош мураббийи Жозе Моурино учун бу А Серия доирасида уй учрашувларидаги илк мағлубияти бўлди. Шу тариқа «Милан»дан учралган мағлубият Моуриньонинг Италия чемпионати уй ўйинларидаги 43 ўйиндан иборат мағлубиятсиз сериясини тўхтатди.
Қайд этиш керак, ушбу кўрсаткич Италия чемпионатидаги 3 очколик даврда (1994/95 йилги мавсумдан бери) мураббийлар учун энг яхши натижа ҳисобланади.
Ибраҳимович миллий чемпионатлар доирасида 400-голини урди
«Милан» ҳужумчиси Златан Ибраҳимович А Серия 11-туридан ўрин олган «Рома»га қарши ўйинда (2:1) гол урди.
Швециялик футболчи учун бу гол ўзи ўйнаган барча миллий чемпионатлардаги 400-гол бўлди. У Швеция чемпионатидаги илк голини бундан 22 йил аввал, 1999 йилнинг 30 октябрида «Малмё» сафида урганди.
А Серияда эса бу гол 40 ёшли ҳужумчи учун 150-гол бўлди. У фаолияти мобайнида «Ювентус», «Интер», «Милан», «Аякс», «Барселона», «ПСЖ», «Манчестер Юнайтед» ва «Лос-Анжелес Гэлакси» клубларида тўп сурган.
Германия Кубоги нимчорак финалига қуръа ташланди
Германия Кубогининг нимчорак финал босқичига қуръа ташланди. Унга кўра, 1/8 финал босқичида «Боруссия Д» «Санкт-Паули»га қарши майдонга чиқади. «Бавария» эса мазкур босқичга қадар етиб келолмади. Беллашувлар 2022 йилнинг 18—19 январь кунлари бўлиб ўтади.
Германия Кубоги
1/8 финал жуфтликлари:
«Ҳоффенҳайм» – «Фрайбург»
«Санкт-Паули» – «Боруссия Д»
«Мюнхен-1860» – «Карлсруэ»
«Ҳанновер» – «Боруссия М»
«Ҳерта» – «Унион»
«Кёльн» – «Ҳамбург»
«Лейпциг» – «Ҳанза»
«Бохум» – «Майнц».
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)