Afg‘onistonda hokimiyatini qo‘lga olgan “Tolibon” harakatiga qarshi Afg‘oniston Milliy qarshilik frontining yetakchisi Ahmad Mas’ud ayni damda Tojikistonda. Bu haqda xalq lashkari vakili, shimoliy Panjsher viloyati gubernatorining sobiq o‘rinbosari Kabir Vasik “TASS” bilan suhbatda ma’lum qildi.

Foto: Getty Images

“Ahmad Mas’ud hozir Tojikistonda, lekin goh-gohida Afg‘onistonga borib turadi, u yerda mamlakatning turli mintaqalaridagi qarshilik guruhlari bilan uchrashadi”, — deydi xalq lashkari vakili.

Uning so‘zlariga ko‘ra, Mas’ud ayni damda “Tolibon” jangarilariga qarshi turish uchun turli davlatlardan yordam olishga harakat qilmoqda. “Masud mintaqa davlatlari va butun xalqaro hamjamiyatni ‘Tolibon’ga qarshi kurashish zarurligiga ishontirmoqchi. U turli mamlakatlarga safarlar uyushtirib, ularning e’tiborini Milliy qarshilik frontiga qaratishga va qo‘llab-quvvatloviga erishishga urinmoqda”, — dedi Vasik.

Sobiq gubernator o‘rinbosari Tojikiston bilan Panjsher frontining aloqalari yaxshi ekani, mamlakat “Tolibon’ga qarshi kurashda afg‘on xalqiga doim katta yordam ko‘rsatib kelgani va hozir ham ko‘rsatayotganini” ta’kidladi.

23-sentabr kuni Tojikiston prezidenti Imomali Rahmon Birlashgan Millatlar Tashkiloti Bosh Assambleyasining 76-sessiyasida so‘zlagan nutqida Afg‘onistonda saylovlar o‘tkazish va barcha etnik guruhlar vakillari, jumladan, afg‘onistonlik tojiklar ishtirokida keng qamrovli hukumat tuzishga chaqirgandi. Uning fikricha, Afg‘onistonning barcha aholisi manfaatlarini hisobga olmasdan tuzilgan har qanday hukumat halokatli oqibatlarga olib kelishi mumkin. Bundan tashqari, Rahmon Afg‘oniston hududida xalqaro terrorizmning qayta tiklanishi xavfidan ogohlantirgan.

29-oktabr kuni Tojikistonning bir qancha OAVlari Dushanbeda Afg‘oniston milliy qarshilik frontining ofisi ochilgani haqida xabar tarqatdi. Ayni paytda Tojikiston Tashqi ishlar vazirligi  ularda bu haqda hech qanday ma’lumot yo‘qligini ma’lum qildi.