Turkmanistonda Betaraflik kunini nishonlash uchun o‘lchami 210 kvadrat metr keladigan yangi ulkan gilam yaratilmoqda. Uni yaratish ustida Bolqon viloyatidagi “Serdar” badiiy gilamdo‘zlik korxonasi hunarmandlari ishlamoqda, deb xabar berdi Turkmenportal.
“Turkmanxali” davlat korxonasi mutaxassisi Ogulmaral Amanjayevaning so‘zlariga ko‘ra, ulkan gilamga Axal guli (gilam naqshi) tushiriladi, gilamning o‘zi esa “Turkmeniň ak öyi” oq uylaridan (o‘tov shaklidagi bino) birini bezatadi.
Turkman milliy gilamdo‘zlik san’ati YuNESKOning Insoniyat nomoddiy madaniy merosi ro‘yxatiga kiritilgan.
Bu yil Turkmanistonning birinchi ulkan gilami “Turkman qalbi” yaratilganiga 80 yil to‘ldi. Undan ko‘p yillar o‘tib yaratilgan, umumiy o‘lchami 301 kvadrat metrli yana bir ulkan turkman gilami “Oltin asr” dunyodagi eng katta qo‘lda to‘qilgan gilam sifatida Ginnesning rekordlar kitobiga kiritilgan.
Turkmanistonda Betaraflik kuni mamlakatdagi ikkinchi muhim milliy bayramdir. Bu sana har yili 12-dekabrda nishonlanadi.
Turkmaniston prezidenti Gurbanguli Berdimuhamedov 25-oktabr kuni Qozog‘iston prezidenti Qosim-Jo‘mart To‘qayevni Turkmanistonning “Betaraflik” ordeni bilan mukofotlagan edi.
Mavzuga doir:
- Berdimuhamedov Ashxoboddagi Maxtumquli yodgorligi qurilishiga tashrif buyurdi. Uning ochilishi 2022-yilga rejalashtirilmoqda
- Berdimuhamedov Toshkentdan qaytgach, Ashxoboddagi tungi yoritish tizimlariga alohida e’tibor qaratishni buyurdi
- Turkmanistonda prezident, vazirlar va deputatlar mamlakat mustaqilligining 30 yilligi sharafiga bir-birini medallar bilan taqdirladi
Izoh (0)