Rossiya Ichki ishlar vazirligi tomonidan ishlab chiqilgan Rossiya va O‘zbekiston o‘rtasidagi kelishuvni ratifikatsiya qilish to‘g‘risidagi qonun loyihasida ikki davlat fuqarolari o‘zaro mamlakatlar hududiga kirgan kundan boshlab 15 kun ichida ro‘yxatdan o‘tish zaruratidan ozod etilishi ko‘zda tutilmoqda. Bu haqda Tashqi mehnat migratsiyasi agentligi xabar berdi.
Avvalroq Rossiya hukumati 150 ming o‘zbekistonlik muhojirning mamlakatga kirishiga qo‘yilgan taqiqni olib tashlagani, Rossiyada o‘zbekistonlik mehnat migrantlarini ishga jalb etish tartibi soddalashtirilishi, Rossiya Ichki ishlar vazirligi mehnat migrantlari uchun elektron patentlarni joriy etish rejalarini e’lon qilgani to‘g‘risida xabar berilgandi.
Eslatib o‘tamiz, 2020-yilning sentabr oyida Shavkat Mirziyoyev “Xavfsiz, tartibli va qonuniy mehnat migratsiyasi tizimini joriy etish chora-tadbirlari to‘g‘risida”gi qarorni imzolagandi. Unda 2021-yil 1-yanvarga qadar Rossiya IIVning pasport-viza xizmati vakolatxonasini O‘zbekistonda ochish hamda ushbu vakolatxonada vaqtinchalik mehnat faoliyatini amalga oshirishga ruxsatnomani (patentni) tayyorlash, rasmiylashtirish va berish xizmatlarini ko‘rsatish ko‘zda tutilgan. Yekaterinburg, Novosibirsk, Samara, Ufa, Chimkent va Istanbul shaharlarida Tashqi mehnat migratsiyasi agentligi vakolatxonalarini ochish rejalashtirilgandi.O‘sha yilning dekabrida O‘zbekiston Tashqi mehnat migratsiyasi agentligi va Rossiya Pasport-viza xizmati hamda Moskva shahrining Ko‘p tarmoqli migratsiya markazi o‘rtasida hamkorlik to‘g‘risida kelishuvlar imzolandi. Ushbu hujjat Rossiyada mehnat qilish istagida bo‘lgan O‘zbekiston fuqarolarini tashkillashtirilgan holda chiqish jarayonlarini soddalashtirishi aytilgandi.
Izoh (0)