Toshkent hokimligi “Do‘stlik” bog‘ini rekonstruksiya qiladi. Bog‘ attraksionlarsiz yashil hududga aylantiriladi

Toshkent shahar hokimligi “Do‘stlik” bog‘ida kutilayotgan o‘zgarishlar taqdimotini namoyish etdi. Ta’kidlanishicha, bog‘ shovqinli attraksionlarsiz haqiqiy yashil dam olish zonasi bo‘ladi.

“Do‘stlik” bog‘i bir necha yil davomida Millatlararo munosabatlar va xorijiy mamlakatlar bilan do‘stona aloqalar qo‘mitasining balansida bo‘lgan va ishlamagan. Chiqindilarni yig‘ish va daraxtlarni sug‘orish Obodonlashtirish boshqarmasi xodimlari va ko‘ngillilar tomonidan amalga oshirilgan.

Bog‘ shaharga qaytariladi, uni Toshkent hokimligi qayta tiklaydi. Mas’ullar bog‘ni avgust oyining oxirida ochishga va’da berdi.

Bog‘da quyidagilar amalga oshiriladi:

• bog‘ning barcha daraxtlari saqlanib qoladi. Shu jumladan, general-gubernator dala-hovlisi davrini ko‘rgan uchta qadimgi chinor daraxtlari ham saqlanadi. Yana 700 tupga yaqin daraxt va buta ekiladi;
• barcha suv havzalari saqlanib qoladi, ularning umumiy maydoni 10 000 kvadrat metr, “yuqori ko‘l”da favvora va lazerli tomoshalar tashkil etiladi. “Kapalak ko‘l”larda filtrlash uchun suv isrof qilinishining oldini olish maqsadida gidroizolyatsiya tashkil etilmoqda. Ko‘l va favvoralarga hamda sug‘orishga suvni yetkazish uchun beshta chuqur, nasosli quduq qazildi;
• bog‘da shovqinli attraksionlar bo‘lmaydi, velosiped yo‘lagi uning markaziy qismidan o‘tib, sayrlar uchun tashkil qilingan yo‘laklar bilan kesishmaydi. Velosipedlar, samokatlar va skeytlar ijarasi tashkil qilinadi;
• bolalar uchun maydonchalar, mavzuli, matematik, geografik, astronomik, lingvistik va boshqa yo‘nalishlardagi hududlar tashkil qilinib, ular fanlarni o‘yin shaklida o‘rganish uchun formula va alifbolar bilan ta’minlanadi;
• konsertlar va boshqa tadbirlar uchun amfiteatr, shaxmat, vorkaut, yoga hududlari hamda sport maydonchalari quriladi;
• xohlovchilarga maysali joylarda piknik qilish uchun hududlar ajratiladi. Shuningdek, avtomobil va velosipedlar uchun katta turargoh qurilmoqda;
• 1976-yilda Toshkent va Sietl shaharlari o‘rtasidagi qardoshlik aloqalarining ramzi sifatida bunyod etilgan “Sietl bog‘i” ham rekonstruksiya qilinadi. Rekonstruksiya mualliflari bog‘ning birlamchi ko‘rinishini qaytarish maqsadida plitkalar va bolalar rasmlari bilan bezatilgan ko‘rinishini iloji boricha qaytarishga urinadi. Shuningdek, globusli chiroyli favvora qayta ishga tushiriladi;
• eskirgan muhandislik kommunikatsiyalarining o‘rniga yangilari o‘tkazilmoqda. 120 ta yoritgich o‘rnatiladi;
• bog‘ga kirish bepulligicha qoladi.

Eslatib o‘tamiz, Toshkentda bog‘lar, yashil hududlar va xiyobonlar soni ko‘paytirilishi ma’lum qilingandi. Unga ko‘ra, Toshkent shahrida umumiy 140 gektar maydonga ega bo‘lgan attraksionlarsiz bog‘larni va har bir tumanda kichik yashil bog‘larni tashkil qilish rejalashtirilgan.