Термиз шаҳрида «Япон боғи» ва археолог Кюдзо Като мемориал музейи қурилади

Сурхондарё вилоятининг Термиз шаҳрида замонавий «Япон боғи» ҳамда япониялик машҳур археолог Кюдзо Като мемориал музейи қурилади, деб хабар берди ЎзА.

Маълум қилинишича, япониялик профессор, халқаро кузатувчи Тетсужи Танака Термиз шаҳрида бўлиб, Сурхондарё вилояти ҳокими ўринбосари, вилоят Туризм ва спорт бош бошқармаси бошлиғи Жўрабек Тўраев билан учрашган. Унда вилоят Туризм ва спорт бош бошқармаси, вилоят Архитектура ва қурилиш бошқармаси, Термиз шаҳар ҳокимлиги мутасаддилари иштирок этган.

Учрашувда вилоятнинг туристик салоҳияти, Термиз шаҳрида 5,5 гектар майдонда барпо этиладиган замонавий «Япон боғи», япониялик машҳур археолог Кюдзо Като мемориал музейи қурилиши ва олимнинг хотира ҳайкалини ўрнатиш билан боғлиқ масалалар атрофлича муҳокама этилган.

Таъкидланишича, ушбу боғни Термиз шаҳри марказидаги «Бахт боғи» ҳудудидан қуриш режалаштирилган. Бунинг учун шаҳар ҳокимлиги 5,5 гектар ер ажратган. «Япон боғи»да Кюдзо Като мемориал музейини қуриш ва олимнинг хотира ҳайкалини ўрнатиш баробарида 100 ўринли муҳташам меҳмонхона ҳам барпо этилади. Боғ атрофи яшил майдонга айлантирилиб, ранг-баранг гулзорлар ташкил қилинади, йўлаклар қурилади.

«Мамлакатингизга бу сафар келишдан мақсад Президент сайловида халқаро кузатувчи сифатидаги миссиям бор эди. Термизга эса Кушон ҳукмронлиги даврида бунёд этилган буддавийлик археологик ёдгорликларини кўриш ва яна Термиз шаҳрида барпо этиладиган ‘Япон боғи’да жаноб Кюдзо Като хотирасига бағишланган ҳайкал ўрнатиш, келгусида ҳудудда олиб бориладиган археологик қазиш ишларига япон олимларини ҳам жалб этиш масалаларини ўрганиш учун келдим», — дейди профессор Тетсужи Танака.­

Унинг сўзларига кўра, 2022 йилнинг май ойида Кюдзо Като таваллудининг 100 йиллиги нишонланади,­ археологнинг ҳайкали Тожикистонда тайёрланмоқда. «Уни олиб келиб, шу боғга ўрнатишни биз ўз зиммамизга оламиз. Шунингдек, мазкур лойиҳа бизнинг ғояларимиз ҳам эътиборга олиниб, амалга оширилса, мақсадга мувофиқ бўлар эди», — дейди у.

Учрашув якунида япониялик профессор боғ барпо этиладиган ҳудуд билан танишиб, таклиф ва тавсияларини билдирган. Термиз туманидаги «Фаёзтепа» археологик ёдгорлигини томоша қилган, Ўзбекистонни Афғонистон билан боғлайдиган Термиз—Хайратон кўпригини бориб кўрган.