O‘zbekiston elektr tarmoqlarida 2023-yilda birinchi yuqori kuchlanishli raqamli podstansiya ishga tushiriladi, deb xabar bermoqda Energetika vazirligi matbuot xizmati.
Qayd etilishicha, 220 kV kuchlanishli raqamli podstansiya Jizzax viloyatining Zafarobod tumanida quriladi. Qurilish ishlari bilan “tayyor holda topshirish” sharti asosida Xitoyning Shanghai Electric Group Co., Ltd kompaniyasi shug‘ullanadi. Ushbu kompaniya Osiyo taraqqiyot banki talablariga ko‘ra o‘tkazilgan xalqaro tender savdolarida g‘olib bo‘lgan. Konsalting kompaniya sifatida Germaniyaning GOPA — International Energy Consultants GmbH kompaniyasi faoliyat yuritadi.
Mazkur loyiha O‘zbekiston Prezidentining 2020-yil 28-apreldagi “Raqamli iqtisodiyot va elektron hukumatni keng joriy etish chora-tadbirlari to‘g‘risida”gi qarori hamda 2020-yil 28-dekabrdagi “O‘zbekiston Respublikasining 2021–2023-yillarga mo‘ljallangan investitsiya dasturini amalga oshirish chora-tadbirlari to‘g‘risida”gi qarorlariga muvofiq amalga oshirilmoqda.
“Texnologik jarayonlarni boshqarish to‘liq yuqori darajada avtomatlashtirilgan, eng zamonaviy axborot texnologiyalarining boshqaruv tizimlari va vositalari bilan jihozlanadigan raqamli “Zafarobod” podstansiyasi viloyat energetika tizimini 500 MVA qo‘shimcha quvvat bilan ta’minlaydi”, — degan “O‘zbekiston milliy elektr tarmoqlari” boshqaruvi raisi o‘rinbosari Feruz Qurbonov.
Izoh (0)